Bakının tələbi: üç gün sonra Xankəndidə nə olacaq? - VİDEO

09:08

Xankəndidəki separatçı-terrorçu rejimin “rəhbəri” Araik Arutyunyan fevralın 23-də müraciət edəcəyini açıqlayıb.

Publika.az xəbər verir ki, baş separatçının müraciətinin qondarma rejimin daxilində yaşanan siyasi intriqalarla bağlı olacağı gözlənilir.

Proseslər qondarma “dövlət naziri” Ruben Vardanyanın uzaqlaşdırılması ətrafında cərəyan edir. Araik istəsə də, Ruben getməməkdə israrlıdır.

Ermənistan mediası isə fevralın 23-də Vardanyanın qondarma “dövlət naziri” vəzifəsindən çıxarılacağını yazır. Gözləniləndir ki, Araik müraciətində bunu elan edəcək.

“İravunk” nəşri mənbələrə istinadən bildirir ki, fevralın 23-də Vardanyanla bağlı qərar veriləcək, o, “vəzifəsindən” uzaqlaşdırılacaq.

“Lakin Vardanyan Qarabağı tərk etmək istəmir və orada yaşamağa davam edəcək”, - nəşr yazır.

Qeyd edək ki, Vardanyanı Qarabağa gətirən Rusiya erməni əhalisinin rəsmi Bakı ilə təmaslarında ondan istifadə etmək niyyətindədir. Lakin bu plandan məlumatlı olan Azərbaycan birmənalı şəkildə bundan imtina edir. Prezident İlham Əliyev Münxendə çıxışı zamanı da bəyan etdi ki, Qarabağ erməniləri Azərbaycan vətəndaşlarıdır, azlıqdır.

“Azərbaycan çoxmillətli ölkədir və Azərbaycanda bütün azlıqlar mədəniyyət, dil, həmçinin təhlükəsizlik də daxil olmaqla, eyni hüquq və üstünlüklərdən faydalanırlar. Biz Qarabağdakı erməni icmasının nümayəndələri ilə praktiki təmaslara başlamağa hazırıq. Lakin biz bunu o zaman edə bilərik ki, Rusiya vətəndaşı, cinayətkar oliqarx, Avropada çirkli pulların yuyulmasında əli olan şəxs - Vardanyan bizim ərazimizi tərk etsin”, - İlham Əliyev qəti mövqe sərgilədi.

Vardanyanın “vurulması”nda əsas həlledici amilin Bakının tələbi olduğuna dair fikirlər var. Ermənilər hesab edir ki, bu tələb icra edilməsə, Bakının təzyiqləri güclənə bilər.

Asif