Xocalı görüşünün yeni detalları: Bakı vaxt qoydu, iki tələb... - Video

10:00

Qarabağdakı erməni əhalisi ilə Xocalıda keçirilən görüşün yeni detalları ortaya çıxıb.

Publika.az xəbər verir ki, erməni mənbələr Bakının cari olaraq iki məsələ üzərində dayandığını yazır.

Birinci məsələ Qarabağdakı mədənlərdə monitorinqin aparılmasıdır.

“Bakı bu tələbi ilkin şərt kimi irəli sürüb və danışıqlarda müəyyən razılıqların olduğu haqda məlumatlar var”, - “arsaxpress” adlı qondarma sayt separatçılara istinadən yazır.

Separatçıların qondarma “rəsmilərindən” Artak Beqlaryan da təsdiq edib ki, görüşdə mədənlərə giriş məsələsi müzakirə edilib.

İkinci məsələ Laçın yoluna nəzarətdir.

Erməni mənbələr yazır ki, Bakı mədənlərə girişin təmin edilməsindən dərhal sonra bu tələbin icrasını irəli sürür.

“Müzakirələr Laçın dəhlizində “X-ray” skaner cihazlarının qurulması ilə bağlıdır. Bakı bu cihazların başında öz nümayəndəsinin də dayanmasını istəyir, lakin məsələ hələ açıq olaraq qalır”, - “hayeli” saytı yazır.

Sayt qeyd edir ki, Bakı tələblərinin ən qısa müddətdə yerinə yetirilməsini istəyir.

Separatçıların digər “rəsmisi” Seyran Ayrapetyan deyib ki, Laçın yoluna cihazların qurulmasına razıdırlar: “Lakin Bakının öz nümayəndəsini dəhlizə göndərməsini qəbul etmirik. Cihazlar qurulsun, nəzarət də sülhməramlılar tərəfindən aparılsın”.

Qeyd edək ki, Xocalıda keçirilən görüş Qarabağdakı erməni əhalisinin Azərbaycan cəmiyyətinə inteqrasiyası prosesində ilk addım kimi qəbul edilir.

Asif