Duzlaqda qədim mumiya tapılıb - FOTO

AMEA Arxeologiya və Etnoqrafiya İnstitutunun elmi işçisi Pərviz Qasımovun QAZİLER.AZ-a verdiyi xəbərə görə, Güney Azərbaycanın Zəncan şəhərindən 75 km uzaqda yerləşmiş Çehrabad şəhəri yaxınlığındakı duzlaqda (duz yatağı şaxtalarında) e.ə. 4 əsrə aid insan qalıqları tapılıb. Bunlar həmin dövrdə duzlaqlarda işləmiş fəhlələrin qalıqlarıdır. Vaxtilə şaxtada qəza baş verib, fəhlələr duz çökməsinin altında qalıblar.

Amma duz (natrium-xlor) mikrobları məhv etdiyindən üzvü materialda (meyitlər, ağac alətlər, gön-dəri məmulatları, paltar və s) çürümə getməyib. Sadəcə qaxaclanma olub. İndi ingilis, alman, isveç və d. aimlər fars alimləri ilə birgə 2300 il yaşı olan bu nadir tapıntıları tədqiq edirlər. Qeyd edək ki, bu ərazi Duzlaq adlanır. Farslar onu Douzlak kimi yazmış, indi Avropa elmi nəşrlərində tapıntılar "Douzlak tapıntıları" kimi gedir.

Pərviz Qasımov onu da bildirdi ki, maraqlısı onların ayaqqabıları, çəkmələri, paltarları və hətta əlcəkləridir. Bütün bunlara arxeoloqlar çox nadir hallarda rast gəlirlər. Olub ki, tunc və antik dövr Azərbaycan nekropollarında hətta parça və parça qalıqlarına, üzəri oymalı və yazılı ağac parçalarına rast gəlinib. Lakin torpaqdan çıxarandan sonra onlar ən tez 12 saat və ya ən gec 1 il içində toza çevrilib dağılıblar.

Məsələn, Mingəçevir ekspedisiyasında XX əsrin 40-cı illərində tunc dövrünə aid geyim, parça, dəri qalıqlarına kütləvi surətdə rast gəlindi, hətta dəfn qablarının içində süd məhsuları qalıqları da var idi. Amma tez bir zamanda çürüyüb toza döndülər. Yaxşı ki, bir hissəsinin şəklini çəkmək mümkün olmuşdu.