Bu müəssisənin əməkdaşları 7 aydır maaş almır - FOTO

Hazırda 1 saylı İxtisaslaşdırılmış Dəmir Yolu Müəssisəsində bir neçə aydır maaşlarını ala bilməyən əməkdaşlar idarə binasının qarşısına toplaşaraq əmək haqlarını tələb edirlər.

İdarə əməkdaşları Publika.az-a açıqlamalarında bildirdilər ki, 1 saylı İxtisaslaşdırılmış Dəmir Yolu Müəssisəsi onların maaşlarını may ayından bu yana ödəməyib: “Bizə deyirlər ki, gedin evə, hər şey yaxşı olacaq. Ancaq hər dəfə belə edirlər, maaşlarımızı vermirlər. Hətta bayram günlərində də bizə pul verilmədi. Daha bəsdir, evdə ailəmiz, uşağımız var. Bu gün axşama qədər buradayıq, maaşlarımızı idarədən tələb edəcəyik”.

Məsələ ilə bağlı sözügedən müəssisənin rəhbərliyi ilə əlaqə saxlamağa çalışdıq.

Müəssisənin rəhbəri Əşrəf Lütfəlibəyov zənglərimizə cavab verməsə də, idarə rəisinin müavini Vasif Hüseynov Publika.az-a açıqlamasında bildirdi ki, əməkdaşların etirazları maaşların verilməməsinə görədir: “Bəli, may ayından bəri maaşlar verilmir. Əməkdaşlar da idarəmizə gəliblər, hazırda yığışmışıq, bir yerdə söhbət edirik, müzakirələr aparırıq. Maaşların verilməməsinin səbəbi odur ki, yuxarıdan – Dəmir Yolu İdarəsindən bizə pul verilmir. Ona görə də 7 aydır ki, işçilərin maaşlarının ödənilməsində problemlər yaranıb. Hazırda söhbət aparılır. Gələn həftə ərzində maaşlar verilməlidir”.

Tural Turan