Fərhad Mehdiyevdən məktəbdəki biabırçılığa SƏRT REAKSİYA: İnsan heyvanlaşdıqca...

Məktəblərin birində tərbiyədən uzaq yeniyetmə məxluqların dərsdə əyləndikləri görülür. Xanım müəllim də başını aşağı salıb nəsə yazır. 19 il universitetdə dərs demişəm, ikicə dəfə dərsdə tərbiyəsiz davranış görüb şiddətli formada cəzalandırmışam. Döyməmişəm, bağırmamışam, amma baxışlarım və qərarlığım həmin kəslərin ağıllarını başına qoymağa bəs edirdi.

Publika.az">Publika.az xəbər verir ki, bu sözləri beynəlxalq hüquq üzrə mütəxəssis Fərhad Mehdiyev məktəblərin birindən yayılan qeyri-etik hərəkətlər edən şagirdlərin videosu haqqında danışarkən deyib.

Vəkil bildirib ki, cəzalandırma mexanizmi olmadan, xüsusilə lazımi tərbiyə görməmiş insanlarda çox fərqli davranış pozuntuları ortaya çıxır:

“İnsana göstərilən rəftar onun səviyyəsinə görə olur, o, heyvanlaşdıqca özünə qarşı heyvan rəftarının tətbiqinə zəmin yaradır. Təbii ki bütün bunlardan əvvəl xüsusilə uşaqlara düzgün tərbiyə və etiket qaydaları aşılanmalıdır. Amma bu tərbiyələndirmənin yanında bir də cəzanın olduğu da bildirilməli və cəzalar da tətbiq olunmalıdır.

Tərbiyəsiz yeniyetmələrə gəldikdə isə, onlara sıra ilə bunlar tətbiq olunmalıdır:

1. Psixoloqa getmə;

2. Psixoloqa getməkdən yayındığı halda yetkinlik yaşına çatmayanlar üzrə sahə müvəkkili ilə profilaktik tədbirlərin görülməsi;

3. Bunlar fayda vermədiyi halda xüsusi təyinatlı məktəblərdə oxudulma siyasətinin tətbiqi".