Hacıbala Abutalıbov ya mənə dəymiş ziyanı ödəsin, ya da... - ŞEYX

“Hacıbala Abutalıbov 10 ildir ki, bizə evsiz küçədə qoyub. Düz 10 il bundan öncə mənim Mirzə Ağa Əliyev 73-də yerləşən evim aparılan tikinti-təmir işləri ilə əlaqədar uçub. Evimin qış parkının salınması və yeraltı avtomobil dayanacağının tikintisi səbəbindən uçma akt sənədi ilə rəsmi təsdiq edilib. Məhkəmə ekspert komissiyaları da təsdiq edib ki, məhz yuxarıda dediyim səbəbdən bu bina dağılıb. Problemin həlli ilə əlaqədar 3 məhkəmə qətnaməsi var, lakin icrasız olaraq qalır”.

Bu fikirləri Publika.az-a açıqlamasında Əməkdar incəsənət xadimi Şeyx Əbdül Mahmudbəyov deyib.

O deyib ki, mən indi xahiş edirəm indi ya Hacıbala Abutalıbov gəlib mənə dəymiş ziyanı ödəsin və ya öz villalarından birini mənim üçün versin: “Onun kişi kimi öz borcunu ödəməyə ləyaqəti çatmır? Bu söz-söhbətin yoluna qoyulması üçün problem öz həllini tapmalıdır. Niyə məsələni həll etmək əvəzinə, şişirdib sosial problemə çevirməyə çalışırlar?”.

Ş.Ə. Mahmudbəyov vurğulayıb ki, burada ortaya bir məsələ çıxır: “Beşinci kalon. Hansı ki, bunlar prezidentin uğurlarına, dövlətimizə, dövlətçiliyimizə xəyanət edirlər. Xahiş edirəm səlahiyyətlilərdən bu problemin həlli üçün öz köməkliklərini göstərsinlər. Mən damda ölmək istəmirəm. 78 yaşlı xalq artisti, dəfələrlə müxtəlif mükafatlara layiq görülmüş sənətkara göstərilən hörmət budur?”.