Selçuk Bayraktar: Azərbaycanla PUA istehsalı ilə bağlı planlarımız var

“Azərbaycanda “Bayraqdar-TB2” və digər PUA-larımızı texnoloji cəhətdən inkişaf etdirməklə bağlı planlarımız var. Məsələ ilə əlaqədar həm Rəqəmsal İnkişaf və Nəqliyyat Nazirliyi, həm də “ASAN xidmət”lə görüşlərimiz davam edir”.

Bunu Publika.az-a açıqlamasında “Baykar” şirkətinin texniki direktoru Selçuk Bayraktar deyib.

O əlavə edib ki, Azərbaycanla sadəcə texniki qulluq və istismar deyil, yüksək texnologiyalı proqram təminatı ilə uçan təyyarələrlə əlaqədar çalışmaq üçün iş birliyi olacaq.

S.Bayraktar “Teknofest”dən də danışıb: “Yarışlarda iştirak etmək üçün müraciət 17 fevrala qədər davam edəcək. Gələcəyin PUA-larında, kosmik gəmilərində, sosial sahədəki texnologiyalarda və biotexnologiyadakı yeni inkişaflar üçün cəhdlər edəcək, texnologiyanın çempionlarını yetişdirəcək “Teknofest”də Azərbaycan gəncləri də öz hünərlərini göstərmək üçün imkan əldə edəcəklər. Şuşada da yarışma keçirməklə bağlı fikrimiz var. Yarışmanın adı da Şuşa olacaq. Hər kəsi “Teknofest”ə gəlməyə dəvət edirik”.