Quru yollarının açılması vacibdir - Musa Quliyev

“Milli Məclisdə qadağaların ləğvi ilə bağlı müzakirə keçirilmir. Çünki bu cür məsələlər Operativ Qərargahın səlahiyyətindədir”.

Bunu Publika.az-a açıqlamasında millət vəkili Musa Quliyev deyib.

Deputat qeyd edib ki, Milli Məclis vaxtında lazım olan qanunları qəbul edib, ancaq qadağaların aradan qaldırılması Operativ Qərargahın səlahiyyəti altındadır: “Ümumi olaraq belə məsələlər adıçəkilən qurum tərəfindən həll olunur. Son zamanlar yoluxmanın azalması ilə qadağaların aradan götürüləcəyi düşünülür. Qadağaların aradan qaldırılması ilə bağlı tələsmək lazım deyil. Artıq Çində pandemiyanın yeni dalğası başlayıb və virusa yoluxanların sayı artıb. Digər tərəfdən isə pandemiyanın hər hansısa bir ölkədə bitməsi üçün Ümumdünya Səhiyyə Təşkilatının qərarı olmalıdır. Ölkəmizdə bəziləri istisna olmaqla demək olar ki, bütün qadağalar aradan qaldırılıb. Bunlar quru yollarının açılması, qapalı məkanlarda maskanın ləğvi və digər məsələlərdir. Yumşalmalara gediləcəksə, ilk öncə sərhədlərlə bağlı məsələ həll olunmalıdır. Ancaq pandemiyanın sonuna qədər maskadan istifadə olunması məsələsinin qüvvədə qalması tövsiyə olunandır. Ümumiyyətlə, COVID-19-un yeni bir dalğası ölkəmizə gələrsə, yoluxma sayında artım görə bilərik. Ancaq bunun olmasını heç kəs istəmir”.