Ölkədə milyonlarla insan infeksiyaya yoluxmuş ola bilər - Komitə üzvü

İranda 15 milyon insan koronavirusa yoluxmuş ola bilər.

Publika.az xəbər verir ki, bu barədə ölkənin Səhiyyə Nazirliyinin COVID-19 Epidemioloji Komitəsinin üzvü Ehsan Mustafəvi danışıb.

ISNA-nın xəbərinə görə, videokonfrans yolu ilə jurnalistlərin suallarını cavablandıran rəsmi Qum, Gilan, İsfahan və Elburs əyalətlərində yoluxmanın geniş yayıldığını bildirib.

“Əldəki statistikaya görə, koronavirus pandemiyası başladığı andan bəri ölkədə 15 milyon insan infeksiyaya yoluxmuş ola bilər. Virusu təsbit edən testlərin xətalı olduğunu bir daha vurğulayıram. Bu testlər hələ ki, tam olaraq aidiyyəti qurumların təsdiqini almayıb. Yəni nəticələri analiz edərkən lazımi həssaslığı göstərmək lazımdır”.

Mustafəvi bunun əksinə, ölümlərin düşünüləndən daha az ola biləcəyinə işarə edib: “15 milyonun yoluxduğunu nəzərə alsaq, virusun ölümcüllük faizinin dünyanın və bizim sandığımızdan daha az olduğu ortaya çıxır. Yəni daha xoşxasiyyətli virusla qarşı-qarşıya ola bilərik”.

Son rəqəmlərə görə, İranda 175 min 927 yoluxma, 8 min 425 ölüm faktı qeydə alınıb.

Zümrüd