Separatçı bölgələr arasında gömrük ləğv edildi

Xerson vilayəti ilə Krım arasında dövlət sərhədi inzibati sərhəd statusu alıb, gömrük nəzarəti həyata keçirilmir.

Publika.az xəbər verir ki, bu barədə "ria novosti"yə müsahibəsində Rusiyanın Xersonda yaratdığı hərbi-mülki administrasiyanın rəhbərinin müavini Kirill Stremousov bildirib.

“Dövlət sərhədi inzibati xarakter alıb. Amma bizin cəbhə bölgəsi olduğumuzu nəzərə alsaq, sərhəd xidməti və Federal Təhlükəsizlik Xidməti nəzarət-buraxılış məntəqələrində filtrasiya üçün işləyirlər. Məqsəd diversantların qarşısını almaqdır, amma gömrük yoxdur”, - deyə o bildirib.

Buraxılış məntəqələrində artıq gömrük nəzarəti və rəsmiləşdirilməsi yoxdur.

Rusiyanın tərkibinə daxil olan digər bölgədə, "LXR"də isə gömrüyün ləğvinin uzun və çətin proses olduğunu bildiriblər. "LXR"in Moskvadakı nümayəndəsi Rodion Miroşnikin sözlərinə görə, proses bir neçə ay çəkə bilər.

Bundan əvvəl Dövlət Dumasında Rusiya ilə onun yeni əraziləri arasında gömrük nəzarətinin yaxın gələcəkdə aradan qaldırıla biləcəyi bildirilmişdi. Bununla belə, “hansısa formada” sərhədlər qalacaq.

"Aydındır ki, orada çox tezliklə gömrük olmayacaq, sərhədlər isə dövlətimizin təhlükəsizliyidir, onlar hansısa formada mövcud olacaqlar", - deyə Dövlət Dumasının MDB işləri komitəsinin sədr müavini Viktor Vodolatski bildirmişdi.

Səxavət