Seçkidə II turun sirli tarixi - Ərdoğan İstanbulun fəthi gününə hazırlaşır

Türkiyədə prezident seçkilərinin 28 mayda keçiriləcək II turunun tarixi ciddi müzakirə mövzusuna çevrilib.

Publika.az xəbər verir ki, 14 ayda keçirilən prezident seçkilərində heç bir namizəd 50+1 faiz səs qazana bilmədiyi üçün II tur qanunvericiliyə görə iki həftə sonra keçirilməlidir. Bu, 28 may tarixinə düşür, 29 may isə İstanbulun fəthinin ildönümüdür.

Fatih Sultan Məhmət 53 günlük mühasirədən sonra 1453-cü ilin 29 mayında İstanbulu fəth etmişdi. Türkiyədə II turda Ərdoğanın böyük üstünlüklə qazanacağını və 29 mayın milli iradəyə qarşı çıxanlar üzərində fəth tarixi olacağı müzakirə olunur. Seçki kampaniyasını Ayasofyada namaz qılaraq bitirən Ərdoğanın seçkini qazanacağı təqdirdə - 29 may tarixində yenə bu məsciddə namaz qılacağı deyilir.

Qeyd edək ki, Sultan Məhmət İstanbulu fəth edəndən sonra Ayasofyanı məscid etmişdi. Osmanlı imperiyası dağılandan sonra məscid muzeyə çevrildi. 2020-ci ildə Ərdoğanın qərarı ilə Ayasofya yenidən məscid olaraq fəaliyyətə başladı.

Asif