Gürcüstanda yeni parlament işə başladı: Hökumət istefa verdi

Oktyabrın 26-da keçirilən seçkilərin yekunu üzrə formalaşan Gürcüstan parlamenti öz işinə başlayıb.

Publika.az xəbər verir ki, bu barədə TASS məlumat yayıb.

Bildirilir ki, deputatlar, öz hüquqlarının tanınmasına səs verib və hökumət istefa verib. Respublikanın Baş naziri və bütün nazirlər yeni hökumətin təsdiqinə qədər səlahiyyətlərini icra edəcəklər.

“Gürcü arzusu” partiyasının təsisçisi və fəxri prezidenti Bidzina İvanişvili yeni seçilmiş parlamentdə deputat kürsüsünə oturub.

Gürcüstanın 11-ci çağırış parlamentinin bu gün, noyabrın 25-də keçirilən ilk iclasında o, baş nazir İrakli Kobaxidze və keçmiş baş nazir, indi isə partiyanın sədri İrakli Qaribaşvili ilə birinci sırada əyləşib.

Bundan əlavə, qanunverici orqanın ilk iclasında 88 deputat hakim komandanın nümayəndəsinin namizədliyinin lehinə səs verərək Şalva Papuaşvili yenidən Gürcüstan parlamentinin sədri seçilib.

Hazırda parlament binası yaxınlığında müxalifətin etiraz aksiyası davam edir. İştirakçılar oktyabrda keçirilən səsvermənin nəticələrinin saxtalaşdırıldığını nəzərə alaraq, yeni seçkilərin keçirilməsini tələb edirlər.

Hakim partiyanın deputatları güclü polis nəzarəti altında parlament binasına daxil olublar.

Xatırladaq ki, parlamentə daxil olan digər 4 müxalifət qüvvəsi mandatlarından imtina edib.

Adəm Abbaslı