Allahdan ümidi kəsilən İran çarə tapdı: Urmiyanı bu yolla xilas etmək istəyir

İranda son illərin ən ağır quraqlığını nəzərə alaraq yağıntı yaratmaq məqsədilə bulud səpmə işlərinə başlanıb.

Publika.az xəbər verir ki, bu barədə İRNA agentliyi məlumat yayıb.

Uzun sürən quraqlıq nəticəsində İranın ən böyük gölü Urmiya quruyaraq duz səhrasına çevrilib və ilk bulud səpmə əməliyyatı məhz burada həyata keçirilib.

Urmiya gölündə suyun səviyyəsinin artırılması istiqamətində işlərin digər vilayətlərdə də davam etdiriləcəyi bildirilib. Növbəti əməliyyatların Şərqi və Qərbi Azərbaycan vilayətlərində keçirilməsi planlaşdırılır.

Xatırladaq ki, İran Meteorologiya Xidməti ölkədə “son 50 ilin ən quraq payızını” yaşandığını açıqlayıb. Ölkədə yağıntı səviyyəsi uzunmüddətli orta göstəricidən 89% az olub.

Bundan əlavə, Yaxın Şərqdə azalan su ehtiyatları və iqlim dəyişikliyinin təsiri ölkələr arasında yağış yaratma üsulları ilə bağlı gərginliyi artırır. İran rəsmiləri əvvəllər buludların İrana çatmazdan əvvəl yağış yağdığını iddia edərək, İsrail və BƏƏ-ni bulud səpmə vasitəsilə “yağışlara müdaxilə etməkdə” ittiham etmişdi.

Adəm