Türkiyədə zəhərlənən ailənin daha bir üzvü ÖLDÜ - Saxlanılanlar var

İstanbuldakı "Harbour Suites" otelində zəhərlənən ailənin dördüncü üzvü də dünyasını dəyişib.

Publika.az xəbər verir ki, bu barədə İstanbul Səhiyyə İdarəsinin müdiri Abdullah Güner bildirib.

Onun sözlərinə görə, xəstəxanaya yerləşdirilən ailənin atası Servet Böcek həkimlərin səyinə baxmayaraq dünyasını dəyişib.

Qeyd edək ki, 4 nəfərlik ailənin ölümü ilə bağlı aparılan istintaqda ilk həbs qərarı da verilib. Hadisə ilə əlaqədar midye, lokum, kokoreç satıcıları və kafe sahibi həbs olunub. Bundan başqa, otelin işçiləri və oteldə dezinfeksiya aparan şirkətin əməkdaşları da daxil olmaqla ümumilikdə 11 nəfər saxlanılıb.

Noyabrın 14-də İstanbulda Almaniya vətəndaşı olan 4 türk zəhərlənib. Məlum olub ki, tətil üçün Türkiyəyə gələn dörd nəfərlik ailə noyabrın 12-nə keçən gecə özlərini pis hiss etməyə başlayıb. Onlar qida zəhərlənməsi şübhəsi ilə xəstəxanaya aparılıblar. Ana və iki övladının həyatını xilas etmək mümkün olmayıb. Ailə üzvlərinin küçə yeməklərindən və ya oteldə aparılan dezinfeksiya səbəbilə zəhərləndikləri ehtimal edilir.