İranda dəhşət: Etirazçılar prokuroru diri-diri yandırdılar

Xəbər verdiyimiz kimi İranda vəziyyət xeyli gərginləşib. Kütləvi etirazların genişlənməsi fonunda ölkəni xaos bürüyür.

Gecə etirazların əsas mərkəzlərindən birinə çevrilən Kərəc şəhərində meriya binası yandırılıb.

Publika.az xəbər verir ki, bu gün isə etirazçılar Şimali Xorasan əyalətinin prokurorunu və bir neçə təhlükəsizlik işçisini diri-diri yandırıblar. Xəbəri yerli "Iranwire" xəbər agentliyi yayıb.

Jurnalistlərin sözlərinə görə, prokuror və onun komandasını konteynerə zorla salıblar. Bundan sonra konteyner yandırılıb. Xilasedicilər izdihamı yara bilsələr də hüquq-mühafizə orqanlarının əməkdaşlarını xilas edə bilməyiblər.

Hadisənin əlavə təfərrüatları məlum deyil.

Xatırladaq ki, dekabrın 28-də İranda yerli valyutanın devalvasiyasından sonra etirazlar başlayıb. Polis göz yaşartıcı qaz və pnevmatik silahlardan istifadə etsə də aksiyaların qarşısını ala bilmir. Gücləndirilmiş təhlükəsizlik tədbirləri ilə müşayiət olunan etirazlar bir neçə şəhərə yayılıb. Ən böyük etirazlar Tehranda, ən şiddətli toqquşmalar isə ölkənin qərbində və cənub-qərbində (Məlikşahi, Kirmanşah və Lordeqan şəhərləri) qeydə alınır.

Tural