Tanınmış professordan XƏBƏRDARLIQ - Sinir sistemini çökdürür

Türkiyəli professor Fevzi Sefa Dereköy bildirib ki, bir çox xəstəliklərin şiddətlənməsinə yol açan siqaret həm də sinir sisteminin çökməsinə səbəb olur.

Publika.az Türkiyə mətbuatına istinadən xəbər verir ki, professor siqaretin ilk dəfə miqrenə qarşı vasitə olaraq istifadə edildiyini bildirib. Onun sözlərinə görə, nikotinin mənfi təsirləri sonrada ortaya çıxmağa başlayıb:

“Tütünün ağciyər xərçənginə səbəb olduğu yalnız 1950-ci illərdə elmi araşdırmalarla ortaya çıxdı. Siqaret tüstüsü qaz, qətran qarışığından və təxminən 1000 komponentdən ibarətdir. Bu qarışığın tərkibinə baxsaq, əsasən kanserogenlərdən, qıcıqlandırıcılardan, nikotindən və zəhərli qazlardan ibarət olduğu görə bilərik.

Qıcıqlandırıcı maddələr nəfəs yollarından (bronxlarda) ağciyərlərə daxil olan ifrazatları artırır, eyni zamanda aldığımız havanın və bu sekresiyaları təmizləyən tüklərin və immun hüceyrələrin fəaliyyətini pozur. Nikotin sinir sisteminə təsir göstərir; ürək döyümtülərini sürətləndirir, qan təzyiqini artırsa da, damarları sıxır və qandakı yağları artırır. Xüsusilə passiv siqaret çəkən, kənar tüstülərin təsirinə məruz qalan uşaqlarda bronxial xəstəliklər, badamcıq iltihabı, orta qulaq iltihabı və böyümüş boğaz əti daha çox müşahidə olunur.

Siqaret tüstüsindəki zəhərli qazlar karbonmonoksit, hidrogen sulfid və azot komponentləridir və qanın oksigenləşməsini pozarkən kanserogen təsir göstərir. Siqaret çəkənlərdə ürək xəstəlikləri və astma kimi xroniki ağciyər xəstəliklərinə də daha çox rast gəlinir”.

Ümumilikdə gündə 15 siqaret çəkən 30 yaşlı bir insanın ömrünün 5 ildən çox azaldığını vurğulayan professor bildirib ki, siqaret kişi ölümlərinin 25 faizinə, qadın ölümlərinin 7 faizinə səbəb olur:

“Siqaretin səbəb olduğu xərçəng növlərinə ağciyər, ağız və boğaz, larinqit, mədəaltı vəz, sidik kisəsi və böyrək xərçəngi daxildir. Kişilərdə ağciyər xərçənginin 91 faizi, qadınlarda isə 69 faizi siqaret çəkmə vərdişlərindən irəli gəlir”.

Aytən Məftun