Yataq dəstini tez-tez dəyişin, yoxsa qorxunc...

Yuxu həyatımızın ayrılmaz hissəsidir. Normaya görə, bir insan "Morfey krallığı"nd gündə ən azı səkkiz saat vaxt keçirir ki, bu da bir il ərzində 120 günə bərabərdir. Üstəlik yuxu gigiyenası qaydalarına riayət etmək sağlamlığımız və sərf olunan enerjinin bərpası üçün vacibdir. Əks halda, insanı baş ağrısı, yüksək təzyiq və metabolik pozğunluqlar gözləyir.

Publika.az xəbər verir ki, bu sözləri dermatoveneroloq Natalia Jovtan "Gazeta.ru"ya müsahibəsində bildirib. Həkimin sözlərinə görə, yataq dəstlərini həftədə bir dəfə dəyişdirmək şərtdir.

"Rahat yuxu şəraiti yaratmaq üçün istehsalçılar hər cür ortopedik yastıq və döşəklər təklif edirlər, lakin yataq dəsti və onun dəyişdirilməsi rejimi heç də az əhəmiyyət kəsb etmir. Yuxu zamanı aktiv tərləmə baş verir, sebum ifraz olunur, parçanın liflərində qalır, buna görə də yataq dəstlərini mütəmadi olaraq dəyişdirmək lazımdır. Normal şəraitdə bunu həftədə bir dəfə etmək kifayətdir, lakin hormonal pozğunluqlar nəticəsində xəstəlik və ya həddindən artıq tərləmə varsa, yataq dəstlərini həftədə bir neçə dəfə dəyişdirmək lazım ola bilər.

Patogen mikroorqanizmlər parça liflərində toplana bilər, tər və sebum isə onların çoxalması üçün rahat şərait yaradır. Nəticədə xoşagəlməz qoxu yarana bilər ki, bu da evdə narahatlıq yaradır. Bundan əlavə, patogen mikroflorası qaçılmaz olaraq dəri problemlərinə yol açacaq. Evdə toz gənələri də yığılaraq allergik və tənəffüs xəstəliklərinə səbəb ola bilər", - deyə həkim qeyd edib.

Dermanevratoloq əlavə edib ki, bəzi hallarda, məsələn, yeniyetmələrin üzündə və baş dərisində sebum hiperproduksiyası (seboreya) varsa, bu vəziyyətdə yastıq örtüklərini həftədə iki dəfə dəyişdirmək lazımdır. Bununla belə, o qeyd edib ki, yorğan və yastıqlar da ildə iki dəfə yuyulub təmizlənməlidir.

Aytən Məftun