Bu dərmanla arıqlamağın nəticəsi ağır ola bilər

Bir çox məşhurların arıqlamaq üçün istifadə etdiyi 2-ci tip şəkərli diabetin müalicəsində qəbul edilən "Ozempic" (semaqlutid) sağlamlıq üçün böyük risk daşıyır.

Publika.az xəbər verir ki, bu barədə psixoterapevt, Rusiya Tibb Universitetinin eksperti Mixail Qavrilov danışıb. O bildirib ki, onu qəbul etdikdən sonra ağır nəticələrlə qarşılaşa bilərsiniz, odur ki, bu dərmandan tamamilə imtina etmək daha yaxşıdır.

"Bu dərman 2-ci tip şəkərli diabetin müalicəsi üçün yaradılıb, karbohidrat mübadiləsi pozğunluqlarının öhdəsindən gəlməyə kömək edir. Amma estetik məqsədlə sürətli arıqlamaq üçün nəzərdə tutulmayıb. Əgər diabeti olmayan şəxs dərmanı başqa məqsədlər üçün qəbul etməyə başlayırsa, arıqlayacaq, amma nəticəni qoruyub saxlaya bilməyəcək. Həmçinin, piylənmə və şəkərli diabetli insanlarda müalicə bitdikdən sonra çəki geri qayıdır”, - həkim "Kp.ru" saytına müsahibəsində vurğulayıb.

Onun sözlərinə görə, istənilən effekti saxlamaq üçün bu dərmanı daim qəbul etmək lazımdır. Əks təqdirdə, çəkilmə sindromu meydana gələcək və çəki bir il ərzində və ya daha tez qayıdacaq. Bundan əlavə, sağlamlığınız nəzərəçarpacaq dərəcədə pisləşə bilər. Mütəxəssis qeyd edib ki, dərman insulin ifrazına bağlı olaraq qlükoza səviyyəsini azaldır.

Şəxs huşunu itirmə, ürəkbulanma, titrəmə və qarın ağrısı ilə qarşılaşa bilər. Qavrilov əlavə edib ki, mədənin iflici və peristaltikanın ləngiməsi mümkündür. Belə dərmanların təsiri altında tənzimləyici sistemlərin fəaliyyəti pozulur, orqanizm pisləşməyə başlayır və vaxtından əvvəl qocalması prosesi başlayır.