Gənclər şəhidlərimizi yad etdilər – QHT-dən nəcib təşəbbüs
Bizi izləyin

Sosial

Gənclər şəhidlərimizi yad etdilər – QHT-dən nəcib təşəbbüs

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı və “Öyrədərək Öyrənərək” Gənclərin İntellektual İnkişafına Dəstək İctimai Birliyinin təşkilatçılığı ilə həyata keçirilən “Könüllü ol – Könüllərdə ol!” layihəsi çərçivəsində təşkil olunan tədbirlər başa çatıb.

Layihənin icrasına 31 avqust 2020-ci il tarixdə start verilib. Layihə çərçivəsində 3 aksiya təşkil olunub.

#ŞəhidimİZ aksiyası çərçivəsində 6 şəhid ailəsinə “könüllü payı” (ərzaq yardımı) göndərilib. Daha sonra 03 noyabr tarixində Qazax rayonunun Hüseynbəyli kəndində yerləşən Şəhidlər Xiyabanı ziyarət olunub. Qeyd edək ki, burada Birinci Qarabağ Müharibəsi ilə yanaşı, Vətən Müharibəsində şəhid olan qəhrəmanlarımız da uyuyur.

Daha sonra 04 noyabr tarixində Yuxarı Salahlı kəndində aprel şəhidi, baş-leytenant Elvin Namazovun, 2019-cu il mart ayının 4-də Müdafiə Nazirliyinin N saylı hərbi hissəsində xidməti vəzifəsini yerinə yetirərkən qar uçqununa düşərək şəhid olmuş gizir Hafiz Abdullayevin, 2019-cu ilin mart ayının 26-da Füzuli rayonu istiqamətində gedən döyüşlərdə şəhid olmuş əsgər Əlləz Əlləzvun və nəhayət, bu ilin iyul ayında Tovuz döyüşlərində qəhrəmancasına şəhid olmuş mayor Namiq Əhmədovun məzarları ziyarət olunub.

05 noyabr tarixində Aslanbəyli kəndində aprel şəhidi Orxan Əliyevin və 06 noyabr tarixində Daş Salahlı kəndində 2018-cı ilin fevral ayında Füzuli istiqamətində qəhrəmancasına şəhid olmuş əsgər Süleyman Süleymanovun məzarı ziyarət olunub. Gənclər şəhidlərin məzarları üzərinə gül dəstələri qoyaraq, onların əziz xatirələrini ehtiramla yad ediblər.

#TariximİZ aksiyası çərçivəsində 07 noyabrda Yuxarı Salahlı kəndində Səməd Vurğun Poeziya Evinə, 08 noyabrda Birinci Şıxlı kəndində Molla Vəli Vidadinin qəbirüstü abidəsinə, 09 noyabrda isə Xanlıqlar kəndində Baba-Dərviş qədim yaşayış məntəqəsinə səfərlər təşkil olunub.

#BiliyimİZ aksiyası çərçivəsində “Könüllü kuboku” adlı intellektual yarış təşkil olunub. Yarış sərt karantin rejiminin şərtlərinə uyğun olaraq, geniş tərkibdə deyil, dörd komandanın iştirakı ilə, “breyn rinq” formatında keçirilib.

Yarışın ilk qarşılaşması müstəqil “Elite” və “Şuşa” komandaları arasında keçirilib və birincilərin 4-3 hesablı qələbəsi ilə başa çatıb. Digər qarşılaşma isə “Panteon” və “Red Star” komandaları arasında gerçəkləşib (3-4)

Beləliklə, ilk turda məğlub olan “Şuşa” və “Panteon” komandaları üçüncülük uğrunda mübarizə aparıb və “Şuşa “komandası qalib gəlib. (2-1)

Final görüşü “Elite” və “Red Star” komandaları arasında keçirilib və ikincilər 4-3 hesabı ilə qələbə qazanaraq, turnirin qalibi adını qazanıb.

Qalib komanda kubokla, I, II və III yeri tutan komandaların üzvləri isə müvafiq diplomlarla təltif olunublar.

Qeyd edək ki, layihənin bitmə tarixi 01 dekabr 2020-ci ildir.

Oxumağa davam et
Reklam
Reklam

Gündəm