İlkin vaksinasiya 3 ay müddətində başa çatacaq – Solmaz Qarayeva

“Bu gündən 2 saylı şəhər poliklinikasında vaksinasiyaya start verilir. Yəqin ki, 3 ay müddətində proses başa çatacaq”.

Bunu Publika.az-a açıqlamasında 2 saylı şəhər poliklinikasının şöbə müdiri Solmaz Qarayeva deyib.

Şöbə müdiri bildirib ki, tibb işçiləri vaksinasiya olunduqdan sonra peyvəndlər əhaliyə də vurulacaq: “Artıq 50 yaşdan yuxarı əhalinin siyahısı tərtib olunub. Bizə deyilən kimi onlarla əlaqə saxlanılacaq. İlk olaraq 65 yaşdan yuxarı əhali vaksinasiyaya dəvət olunacaq. Fevralın 1-dən sonra əhalini poliklinikaya dəvət edib vaksinasiya edəcəyik. Onlar da 14-21 gündən sonra revaksinasiya olunacaqlar. Yəni ikinci peyvənd vurulacaq. Vaksin vurulacaq şəxslər əvvəlcə müayinədən keçəcəklər. Onlara “prob” vurulmayacaq”.

S.Qarayeva vətəndaşlara çağırış edib: “Onlara demək istəyirəm ki, bu elə bir infeksiyadır ki, mütləq vaksinasiya olunmalıdır. Hər bir infeksion xəstəliyin qarşısı immunizasiya ilə alınır. Bu dəfə də belə olacaq. Bu, dövlət xətti ilə görülən işdir. Əhalidən xahiş edirəm ki, vaksinasiyaya aktiv qoşulsunlar. Sahə həkimləri çağırdıqda gəlib vaksinasiyadan keçsinlər. Bu, könüllülük prinsipi ilə həyata keçirilir. Əks göstəriciləri olmayanları vaksinasiya edəcəyik. Hamilə qadınlar və 18 yaşa çatmayanlar vaksinasiya olunmayacaq. Bəzi xəstələr var ki, onlara ehtiyatla yanaşmaq lazımdır. Bunlar aktiv epileptik tutmaları olan xəstələrdir”.

Tural Turan