AQTİ səriştəlilik sınaqlarında iştirak etdi

Qida Təhlükəsizliyi İnstitutunun Analitik Ekspertiza Mərkəzinin nəzdində fəaliyyət göstərən laboratoriyalar mütəmadi olaraq peşəkarlıq sınaqlarına cəlb edilir, laboratoriyaların akkreditasiyadan keçməsi, beynəlxalq standartlara uyğunlaşdırılması sahəsində zəruri tədbirlər görülür.

İnstitutun İctimaiyyətlə əlaqələr və maarifləndirmə departamentindən Publik.az-a verilən məlumata görə, müayinə nəticələrinin düzgünlüyünün və etibarlılığının təmin olunması, həmçinin işçilərin səriştəliliyinin artırılması məqsədilə beynəlxalq laboratoriyalararası səriştəlilik sınaqlarında iştirak edir.

Keçən ilin yanvar-dekabr ayları ərzində institutun laboratoriyaları ümumilikdə 120 parametr üzrə Fransa, İngiltərə, Hollandiya, Türkiyə və Amerikanın nüfuzlu laboratoriyaları ilə səriştəlilik sınaqlarında iştirak edib. Səriştəlilik sınaqları əsasən balda keyfiyyət və təhlükəsizlik göstəriciləri, ətin mənşəyi, GMO müayinələri, şərabda təhlükəsizlik və keyfiyyət göstəriciləri, quru meyvələrdə və çərəzlərdə aflatoksin müayinələri, qida məhsullarında ağır metal və digər zəhərli toksikoloji parametrlər və mikrobioloji müayinələr ilə əlaqədar olub. Bununla yanaşı, institutun heyvan sağlamlığı və bitki sağlamlığı sahəsində fəaliyyət göstərən laboratoriyaları təhlükəsizlik göstəriciləri üzrə İngiltərə və Rusiya ilə qarşılıqlı səriştəlilik sınaqlarında iştirak edib.

Qeyd edək ki, 100–dən çox ölkənin iştirak etdiyi səriştəlilik sınaqlarında Qida Təhlükəsizliyi İnstitutunun laboratoriyaları yüksək nəticə əldə edib.