Onlara hörmətlə yanaşmaq hamımızın borcudur - Fərid Məmmədov

"Hərə bir qəhrəman oldu" layihəsi İkinci Qarabağ müharibəsi şəhidlərinin övladlarına dəstək məqsədilə hazırlanıb. Layihə çərçivəsində Birinci Qarabağ müharibəsi şəhid övladlarının şəxsi təcrübəsinə əsaslanaraq İkinci Qarabağ müharibəsi şəhid övladlarına mənəvi dəstəyin verilməsi, gələcək karyeralarının planlaşdırılmasına və inkişafına mədəni yardımın göstərilməsi nəzərdə tutulur.

Publika.az xəbər verir ki, bunu DOST Agentliyinin sədri Fərid Məmmədov deyib.

O bildirib ki, layihə şəhidlərin canı-qanı bahasına qəhrəman olduqları, onların ailə üzvlərinin həyatda apardıqları mübarizələr, onların mənəvi-psixoloji, eləcə də karyera sahəsində uğur qazanaraq həyatlarının qəhrəmanı olduğu mənasını daşıyır: "Layihə çərçivəsində şəhid ailələri ziyarət edilir, psixoloq və pedaqoqlarla daima görüşlər təşkil olunur, dərslərinə, gələcək karyeralarına dəstək tədbirləri keçirilir. Bu kimi tədbirlərin həyata keçirilməsi ƏƏSMN və DOST Agentliyi tərəfindən şəhid ailələrinin dövlət diqqətində olması məqsədini daşıyır. Onları yaşatmaq, tanıtmaq, hər şəhid ailəsinə hörmətlə yanaşmaq hamımızın borcudur".

Layihə pilot şəkildə keçiriləcək. İlkin olaraq Bakı, Sumqayıt və Abşeron ərazisində yaşayan şəhid ailələrini əhatə edəcək.