Bu, Prezidentin siyasətinin əsas istiqamətlərindən biridir - Deputat

2022-ci ilin dövlət büdcəsi layihəsi müzakirə olunan zaman biz gördük ki, Azərbaycan hökuməti yenidən sosial yönümlü siyasəti davam etdirir. Ölkə Prezidenti İlham Əliyevin göstərişi ilə vətəndaşlarımızın sosial rifahının yaxşılaşdırılması üçün xüsusi təkliflərlə çıxış edildi. Ölkəmizdə vətəndaşların rifahının yaxşılaşdırılması, həssas əhali qruplarının sosial müdafiəsinin gücləndirilməsi Prezidentin siyasətinin əsas istiqamətlərindən birini təşkil edir. Dövlət başçısının bu günlərdə imzaladığı yeni fərman və sərəncamlar da bu istiqamətdə xüsusilə son illərdə ardıcıl, geniş miqyas alan sosial islahatların növbəti mərhələsinə başlanmasını təmin edib.

Bunu Publika.az-a açıqlamasında millət vəkili Naqif Həmzəyev deyib.

Deputat bildirib ki, dövlət başçısının hər il olduğu kimi bu il də vətəndaşların sosial rifahının təminatı, onların ehtiyaclarının qarşılanması məqsədilə müavinətlər, pensiyalar, təqaüdlər və maaşların artırılması ilə bağlı imzaladığı sərəncamlar 2,1 milyondan çox şəxsi əhatə edəcək: “Vətəndaşlar yanvar ayından bu islahatlardan faydalana biləcəklər. Qələbədən sonra müstəqillik dövrünün ən bahalı büdcəsini təsdiqləyən və icra etməyə başlayacaq hökumət bu addımı atmaqla çox düzgün qərar verib. Çünki vətəndaşlarımız qalib ölkənin vətəndaşlarıdır. Azərbaycan insanı daha yaxşı yaşamalı, daha çox əməkhaqqı almalıdır. Bu baxımdan da sosial qayğıya ehtiyacı olan, dövlət qulluğunda və özəl sektorda çalışan insanların əməkhaqlarının artırılması alqışlanmalıdır”.

N.Həmzəyev qeyd edib ki, minimum əməkhaqqının artımı əhalinin gəlirlərində artımı təmin etməklə işçi qüvvəsinin rəqabət qabiliyyətinin, əmək məhsuldarlığının artmasını, əməyin leqallaşdırılmasını da stimullaşdırır: “Gələn il minimum əməkhaqqı 2022-ci il üçün nəzərdə tutulan yaşayış minimumunu 43% üstələyəcək. Bu artım eyni zamanda ölkəmizdə xalis minimum əməkhaqqının xalis orta aylıq əməkhaqqına olan nisbəti göstəricisinin də növbəti dəfə yüksəlməsinə imkan verəcək. Minimum əməkhaqqı artımı dövlət sektoru üzrə 400 min, özəl sektor üzrə 400 min nəfər olmaqla, ümumən 800 min işçinin işçini əhatə edəcək. Bu onu deməyə əsas verir ki, bizim çox sayda vətəndaşımız imzalanan sərəncamdan faydalana biləcək. Əhalimiz bu artımların bəhrəsini 2022-ci ildə görəcək. Düşünürəm ki, növbəti illərdə də əməkhaqqının artırılması və insanların sosial rifahının yaxşılaşdırılması istiqamətində işlər davam etdiriləcək. Sosial paketlərin davam etdirilməsi, yenilərinin icra olunması çox yaxşı haldır. Bu sahədə hökumətimiz tərəfindən lazımi işlər görüləcək”.

Akqabay Mıradov