Rusiyalı alimlərdən İlham Rəhimova təbrik məktubu

Rusiya Federasiyasının Elm və Ali Təhsil Nazirliyinin nəzdindəki Rusiya Elmlər Akademiyasının Fəlsəfə və Hüquq İnstitutunun Ural bölməsi həmvətənimiz İlham Rəhimovun ünvanına təbrik məktubu göndərib.

Publika.az xəbər verir ki, təbriknamədə bildirilir:

“Hörmətli İlham Məmmədhəsən oğlu!

Rusiya Elmlər Akademiyasının Fəlsəfə və Hüquq İnstitutunun Ural bölməsinin rəhbərliyi və elmi şurası adından Sizin Rusiya EA-nın üzvü seçilməyiniz münasibətliə səmimi təbrikimizi qəbul edin. Bu, cinayətkarlığın cəzalandırılması, məhkəmə proqnozlaşdırılması, məhkumlara islah-əmək və ölüm hökmü institutunun tətbiq olunması, məhkəmə sistemindəki islahatlar və cinayətkarlıqla mübarizə proqramına dair konsepsiyaların işlənib hazırlanması üzrə mürəkkəb, fundamental, nəzəri və praktiki problemləri ehtiva edən dünya krimoinologiya və penologiya elminə verdiyiniz böyük araşdırmaçılıq töhfəsinin layiqli və ədalətli qiymətidir. Sizin elmi əsərlərinizlə bütöv bir gənc alim-kriminoloqlar və psixoloqlar nəsli, eləcə də bizim institutumuzun əməkdaşları yetişiblər.

Sizə səmimi-qəlbdən möhkəm cansağlığı, rifah və yaradıcılıq uğurları arzulayırıq”.

Təbrik məktubunu REA-nın Fəlsəfə və Hüquq İnstitutunun Ural bölməsinin direktoru V.S.Martınov və institutun elmi şurasının sədri V.N.Rudenko imzalayıblar.