Kilosu 4 manata olan kolbasalar... - AQTA buna niyə göz yumur?

“Yay aylarında kimyəvi reaksiyalar güclənir, çünki isti hava katalizator rolunu oynayır. Hər bir qida məhsulu da müəyyən kimyəvi tərkibə malikdir. İstehlak edilən qidada az da olsa problem olarsa, insan orqanizmində fəsadlara yol açır”.

Bunu Publika.az-a Azad İstehlakçılar Birliyinin (AİB) sədri, Azərbaycan Qida Təhlükəsizliyi Agentliyində (AQTA) ictimai şuranın üzvü Eyyub Hüseynov deyib.

O bildirib ki, bostan məhsullarında problem uzun illərdir yaşanır:

“Uzun llərdir ki, AİB qarpız və yemişin tərkibindəki nitratların miqdarını ölçən cihazlarla yoxlayırdı. Bu il hələ ki, yoxlama aparmamışıq. Qarpız və yemiş nitratlarla zəngindir. Bu da insanlar arasında zəhərlənməyə səbəb olur, eyni zamanda bu məhsulları çox yediyimiz zaman da zəhərlənmə daha da sürətlənir”.

E.Hüseynov qeyd edib ki, qida təhlükəsizliyinin təmin olunması ölkəmizdə ciddi problemdir. O, Azərbaycan Qida Təhlükəsizliyi Agentliyinin (AQTA) vəziyyətə tam nəzarət edə bilmədiyini söyləyib.

“Baxmayaraq ki, bu qurum tarladan və fermadan istehlakçının masasına qədər olan prosesi izləməlidir. Amma təəssüf ki, bunu edə bilmirlər. AQTA-da İctimai Şuranın üzvü olaraq dəfələrlə sədr müavini səviyyəsində məsələ qaldırmışam ki, KİV-lərdə gedən təhlükəli qidalarla bağlı məsələlər təqib edilsin. Bildirilib ki, bütün bunlar təqib olunur. Amma monitorinqlərimiz göstərdi ki, əslində heç bir iş aparılmır. Hazırda televiziya kanallarında 1 kiloqramı 4 manata olan sosis və kolbasaların reklamı gedir. Qida mütəxəssisləri belə onun tərkibində nəyin olduğunu bilmirlər. Bəs bütün bu halları AQTA niyə araşdırmır? Mediada təhlükəli məhsullarla bağlı xeyli yazı gedir, ancaq AQTA buna göz yumur. Belə bir vəziyyət olduğu halda, təhlükəli qida ilə bağlı vətəndaş hansısa dövlət qurumuna müraciət etsə belə onların heç birinin səlahiyyəti yoxdur ki, bunun qarşısını alsın. Uzun prosedur var, cəld mexanizm yoxdur. Təhlükəli qidaların çox olduğu bir dövrdə ictimai təşkilat olaraq bu vəziyyət bizi narahat edir. Çünki insanlar zəhərlənmənin qurbanı olurlar” – deyə AİB sədri narahatlığını dilə gətirib.

Akqabay Mıradov