“Baku Bus”un "səsi" niyə batıb? - Cavab verildi

Paytaxtımızda fəaliyyət göstərən “Baku Bus” avtobuslarında sərnişinlərin maarifləndirilməsi və sərnişindaşıma fəaliyyətini daha səmərəli təşkil etmək məqsədilə mütəmadi olaraq səsləndirilmə sistemi mövcud idi. Belə ki, sərnişinlər avtobusun saxladığı hər bir dayanacaqda ünvanı səsli şəkildə eşidər və bu onların gedəcəkləri mənzilə rahat çatmalarını təmin edərdi.

“Publika.az”a müraciət edən sərnişinlər tərəfindən bildirilib ki, son zamanlarda sözügedən tətbiqin istifadəsi dayandırılıb. Bu isə onların ciddi narahatlığına səbəb olub.

Sərnişinlər şikayətlənirlər ki, hazırda avtobuslarda xəbərdarlıq səsinin olmaması onların problem yaşamasına gətirib çıxarır. Belə ki, onlar bəzi hallarda dayanacaqları ötürmək məcburiyyətində qalırlar.

Üstəlik məlumat lövhələrində davamlı reklamlar nümayiş olunur ki, bu da sərnişinlərin gedəcəyi təyinat nöqtələrini dəqiqləşdirməyə mənfi təsir göstərir.

Sorğumuz üzrə Bakı Nəqliyyat Agentliyinin (BNA) mətbuat katibi Mais Ağayev bildirdi ki, məsələ ilə bağlı məlumatlıdırlar və problem yaxın bir-iki günə aradan qaldırılacaq.

Ayşən Rəhim