Bakıda güclü zəlzələ gözlənilir? - Seysmoloji Xidmət məlumat yaydı
Bizi izləyin

Sosial

Bakıda güclü zəlzələ gözlənilir? - Seysmoloji Xidmət məlumat yaydı

Son günlər bəzi media orqanlarında bu il Azərbaycanda güclü zəlzələlər olacağına dair məlumatlar yayılır. Azərbaycan ərazisi Alp-Himalay qırışıqlıq zonasında yerləşir. Təkcə bizim ölkəmiz deyil, ümumilikdə Cənubi Qafqaz regionu seysmik baxımdan aktiv bölgədir. Seysmik aktiv bölgələrdə zəlzələlərin qeydə alınması ərazinin seysmikliyi ilə əlaqədardır və hər gün təkcə bizim ölkəmizdə deyil, bütün dünyadakı aktiv bölgələrdə yüzlərlə kiçik təkanlar qeydə alınır. Bu zəlzələlərin əksəriyyəti xırda təkanlar olduğuna görə Yer səthinə gəlib çatmır və insanlar tərəfindən hiss olunmur.

Bunu Publika.az-a AMEA nəzdində Respublika Seysmoloji Xidmət Mərkəzinin Elektron Xidmətlər şöbəsinin müdiri Vüsalə Rafiqqızı bildirilib.

Onun sözlərinə görə, seysmik bölgələrimizdə vaxtaşırı maqnitudası 4, bəzən 4-dən bir qədər çox, 5 və ya 5-dən bir qədər yüksək olan, insanlar tərəfindən hiss olunan zəlzələlər də qeydə alınır:

“İl ərzidə seysmik stansiyalarımız tərəfindən Azərbaycan ərazisində 4000-5000, bəzi hallarda isə 6000-ə yaxın zəlzələ qeydə alınır ki, onların arasında maqnitudası 4-5 olan hiss olunan zəlzələlər də olur ki, bu da yuxarda qeyd etdiyim kimi ərazimizin aktiv bölgədə yerləşməsi ilə bağlıdır. Yəni burda qeyri-adi və proqnozluq heç nə yoxdur. Bu, bütün seysmik baxımdan aktiv olan bölgələr üçün xarakterik bir haldır".

Azərbaycanda güclü, dağıdıcı zəlzələlərin gözlənildiyi barədə proqnozlara gəlincə, şöbə müdiri bildirib ki, zəlzələ bu günə qədər dəqiq proqnozu olmayan təbiət hadisəsidir:

"Heç kim deyə bilməz ki, zəlzələ baş verəcək yaxud baş verməyəcək. Çünki bütün dünyada zəlzələnin dəqiq proqnozu yoxdur. Bunun da əsas səbəbi zəlzələ ocaqlarının Yerin dərin qatlarında yerləşməsi ilə bağlıdır. Ölkəmizdə güclü, dağıdıcı zəlzələlərin baş verəcəyinə dair verilən “proqnozlar”ın heç bir elmi və məntiqi əsası yoxdur və vətəndaşlarımız bu cür əsassız məlumatlardan narahat olmasınlar.

AMEA nəzdində Respublika Seysmoloji Xidmət Mərkəzi Azərbaycan Respublikasında zəlzələlərin öyrənilməsi və tədqiqatlarını aparan yeganə dövlət təşkilatıdır. RSXM-də hazırda 84 seysmik stansiya vasitəsi ilə “real vaxt” rejimində fasiləsiz olaraq Respublika ərazisində monitorinq aparılır və alınmış məlumatlar mərkəzin əməkdaşları - alimlərimiz və mütəxəssislərimiz tərəfindən təhlil edilir.

Bununla yanaşı, Mərkəzdə geofiziki, geodinamik və geokimyəvi kompleks tədqiqatlar aparılır. Mərkəz tərəfindən verilən bütün açıqlamalarda biz apardığımız tədqiqatların nəticəsinə istinad edərək, media vasitəsi ilə vətəndaşlarımızı məlumatlandırırıq. Zəlzələ barədə məlumatlar yayarkən insanlarımızın bu məsələyə qarşı həssas olduğu nəzərə alınmalıdır. Çünki heç bir elmi əsası olmayan “proqnozlar”ın yayılması heç bir əsas olmadan insanlarımızda qorxu, təşviş və narahatçılıq yaradır”.

Qeyd edək ki, Bakıda güclü zəlzələnin gözlənildiyi ilə bağlı xəbər yayılıb. Seysmoloq Qulam Babayev Referans.az saytına açıqlamasında bildirib ki, Xəzər dənizində bir neçə hiss olunan təkanlar qeydə alınıb: “Hiss olunmayan zəlzələlər hər gün baş verir. Bu il Azərbaycan ərazisində hiss olunan zəlzələlərin baş verməsi istisna deyil. Hiss olunan zəlzələ dedikdə maqnitudası 4.5-5.5 civarında olan zəlzələ gözlənilir”.

Aysel Şahmar

Oxumağa davam et
Reklam
Reklam

Gündəm