Mərkəzi Bank 3 BOKT-un vəzifəli şəxsini cərimələdi

Mərkəzi Bank “Nova Credit Bank olmayan kredit təşkilatı” MMC-nin, “Bank olmayan kredit təşkilatı İDK” MMC-nin və “Azərbaycan Mikro-Kredit” Bank olmayan kredit təşkilatı MMC-nin vəzifəli şəxslərini inzibati məsuliyyətə cəlb edib.

Publika.az AMB-yə istinadən xəbər verir ki, tənzimləyici tərəfindən aparılan cari nəzarət prosesləri çərçivəsində “Bank olmayan kredit təşkilatları haqqında” Azərbaycan Respublikası Qanununun 22.1-ci maddəsinin, “Kredit təşkilatlarının borcalanları haqqında məlumatın Mərkəzləşdirilmiş Kredit Reyestrinə verilməsi Qaydası”nın 3.3-cü bəndinin tələblərinin pozulması səbəbi ilə İnzibati Xətalar Məcəlləsinin 440.1-ci maddəsinə müvafiq olaraq, “Nova Credit Bank olmayan kredit təşkilatı” Məhdud Məsuliyyətli Cəmiyyətinin vəzifəli şəxsi 4 000 manat məbləğində, “Bank olmayan kredit təşkilatı İDK” Məhdud Məsuliyyətli Cəmiyyətinin vəzifəli şəxsi 2 000 manat məbləğində və “Azərbaycan Mikro-Kredit” Bank olmayan kredit təşkilatı Açıq Səhmdar Cəmiyyətinin vəzifəli şəxsi 10 000 manat məbləğində cərimə edilib.