Sosial

Astara Gömrük İdarəsində külli miqdarda narkotik vasitə aşkarlandı - FOTO/VİDEO

26 Dekabr 2025 08:24

Astara Gömrük İdarəsində külli miqdarda narkotik vasitə aşkar edilərək qanunsuz dövriyyədən çıxarılıb.

Bu barədə Publika.az-a DGK Mətbuat və İctimaiyyətlə Əlaqələr İdarəsindən bildirilib.

Ölkə ərazisindən tranzit keçməklə İrandan Rusiyaya "kərəviz və kahı" yükü daşıyan nəqliyyat vasitəsində 58 kiloqram 610 qram həşiş və 89 kiloqram 705 qram marixuana aşkar olunub. Ümumilikdə 148 kiloqramdan artıq narkotik vasitə müsadirə edilib.

Stasionar rentgen qurğusunda aparılan baxış zamanı şübhəli cizgilər müşahidə edildiyindən yük avtomobili kinoloji xidmət itinin tətbiqi ilə ətraflı gömrük yoxlamasından keçirilib. Nəticədə nəqliyyat vasitəsindəki iki paletdə gömrük nəzarətindən gizlədilən narkotik vasitələr aşkarlanıb.

Faktla bağlı araşdırma aparılır.