Krımda I Türkoloji Qurultayın 100 illiyi qeyd edildi - FOTO

Krımda nəşr olunan Nenkecan jurnalının yeni sayı I Türkoloji Qurultayın 100 illiyinə həsr edilib.

Jurnalın redaktoru və baş yazarı Zera xanım Bəkirova I Türkoloji Qurultayda Krım tatar xalqını təmsil edən 8 şəxsiyyət – Bəkir Çobanzadə, Mahmud Nedim, Həsən Səbri Ayvazov, Həbibulla Odabaşı, İsmayıl Lemanov, Osman Akçokraklı, Şövqü Bektore, Yakub Kamal haqqında ətraflı məlumat təqdim edib.

Nəşrdə, həmçinin 1926-cı il fevralın 26-da Bakıda "İsmailiyyə sarayı"nda başlayan I Türkoloji Bakı Qurultayının tarixi, əhəmiyyəti və iştirakçıları barədə geniş məlumat yer alıb.

Fevralın 26-da "Nenkecan" qadın jurnalının təşəbbüsü ilə Krımın Ağməscid şəhərində qurultayın 100-cü ildönümü münasibətilə iftar süfrəsi təşkil olunub. Tədbirdə 1937–38-ci illərdə repressiyaya məruz qalan qurultay nümayəndələrinin xatirəsi ehtiramla yad edilib.

Yığıncaqda jurnalın baş redaktoru Zera Bəkirova, filologiya elmləri namizədi, Krım Mühəndislik və Pedaqoji Universitetinin dosenti Lenura Koroğlu, İstanbul Universitetinin doktorantı Gülnar Seitvaniyeva və ədəbiyyatşünas alim Cəmilə Süleymanova çıxış ediblər. Çıxışlarda I Qurultayın türk dünyasında buraxdığı izlərdən, ana dilinin qorunması uğrunda aparılan mübarizələrdən, ortaq türk əlifbasına keçidin əhəmiyyətindən, Azərbaycanda qurultaya hazırlıq prosesindən, əlifba islahatından və türk dünyasının birliyindən bəhs olunub.