Yasamal Rayon İcra Hakimiyyətində başçı sakinləri qəbul etdi - FOTO

Azərbaycan Respublikasının Prezidenti cənab İlham Əliyevin vətəndaşların müraciətlərinin həlli ilə bağlı göstərişinə uyğun olaraq paytaxtın Yasamal rayonunda sakinlər üçün iyun ayı üzrə qəbul keçirilib.

Publika.az xəbər verir ki, Yasamal Rayon İcra Hakimiyyətinin başçısı Elşad Həsənov bir qrup sakini qurumun inzibati binasında qəbul edib. Tədbirdə həmçinin Yasamal RİH-in məsul şəxsləri, rayon bələdiyyəsinin sədri və MKTB rəisi də iştirak edib.

Sakinləri salamlayan İcra Hakimiyyətinin başçısı Elşad Həsənov onlardan təklif, müraciət və şikayətləri bərədə ətraflı danışmağı xahiş etdi. Söz alan Yasamal rayon sakinləri Azərbaycan Respublikasının Prezidenti cənab İlham Əliyevə vətəndaşların hakimiyyət orqanları tərəfindən mütəmadi qəbuluna dair tapşırığına görə dərin minnətdarlığını ifadə etdilər. Daha sonra sakinlər dövlət ehtiyacları üçün satın alınan ərazilərin söküntüsü, qaraj üzrə mülikiyyət hüququ, qanunsuz tikililərlə mübarizə, söküntüyə görə kompensasiya məbləği, yataqxanada yaşayış hüququnun rəsmiləşdirilməsi, küçələrdə reklam, məşğulluq və müxtəlif məsələləri əhatə edən sosial mövzular qaldırdılar.

İcra başçısı Elşad Həsənov qəbul zamanı müraciət edən rayon sakinlərini dinləyərək onların problemlərinin aradan qaldırılmasına dair RİH əməkdaşlarına bir sıra konkret göstərişlər verdi.Qəbul zamanı bəzi məsələlər yerindəcə həll edildi, icrası vaxt tələb edən müraciətlər isə araşdırılaraq həll edilməsi üçün icraata götürüldü.