Zakir Fərəcov növbəti dəfə səyyar qəbul keçirdi

Sumqayıt Şəhər İcra Hakimiyyətinin başçısı Zakir Fərəcov şəhərin 10-cu mikrorayon ərazisində növbəti səyyar qəbul-görüş keçirib.

Publika.az xəbər verir ki, qəbulda Şəhər İcra Hakimiyyətinin məsul şəxsləri, aidiyyəti idarə və təşkilatların rəhbərləri, kommunal və xidmət sahələrinin nümayəndələri, habelə sakinlər iştirak ediblər.

Səyyar görüş çərçivəsində vətəndaşların gündəlik həyatında qarşılaşdıqları məsələlər, ərazinin sosial və kommunal problemləri, eləcə də müxtəlif xarakterli müraciət və təkliflər müzakirə olunub. Sakinlər onları narahat edən məsələləri birbaşa şəhər rəhbərinə çatdıraraq, həllinə dair gözləntilərini bildiriblər.

Zakir Fərəcov vətəndaşların müraciətlərini dinləyərək qaldırılan məsələlərin hər biri ilə bağlı aidiyyəti qurumların rəhbərlərinə müvafiq tapşırıqlar verib. Bildirilib ki, səsləndirilən problemlər müəyyən edilmiş qaydada araşdırılmalı və qanunvericiliyin tələblərinə uyğun olaraq onların həlli istiqamətində zəruri tədbirlər görülməlidir. Qaldırılan məsələlərin əhəmiyyətli bir hissəsi yerindəcə öz həllini tapıb.

Görüş zamanı şəhərin ayrı-ayrı ərazilərində həyata keçirilən abadlıq-quruculuq işləri, kommunal xidmətlərin təşkili, sosial məsələlər, məşğulluq və digər sahələrlə bağlı mövzular da diqqət mərkəzində olub.

Vurğulanıb ki, vətəndaşların problemlərinin yerində öyrənilməsi, onların operativ şəkildə aidiyyəti qurumlara yönləndirilməsi və görülən işlərin nəticələrinin izlənilməsi bundan sonra da davam etdiriləcək.

Sakinlər göstərilən diqqətə və müraciətlərinin yerində dinlənilməsinə görə minnətdarlıqlarını ifadə ediblər.