İrəvanda borc üstündə "RAZBORKA": iki zabit bıçaqlandı, Davit öldü

Vazgen Sarkisyan adına hərbi universitetin yaxınlığında Ermənistan Müdafiə Nazirliyinin zabitləri ilə mülki şəxslər arasında bıçaqlanma baş verib.

Publika.az xəbər verir ki, bu barədə "Hraparak" məlumat yayıb.

Əldə edilən məlumata görə, mübahisənin predmeti pul, borc və tələb olub.

"Razborka"da 8 nəfər iştirak edib, onlardan 4-5-i hərbçi olub. Söhbət zamanı borclu şəxs hərbçilərin ünvanına təhqiramiz ifadələr işlədib, sonra özü ilə gətirdiyi bıçaqla kreditora, Müdafiə Nazirliyinin istefada olan zabiti Gevorq Marqaryana və zabit, baş leytenant Davit Sayadyana ağır bədən xəsarətləri yetirib.

Həmin gün təcili yardım maşını Gevorq Marqaryan və Davit Sayadyanı “Müqəddəs Qriqor Lusavoriç” tibb mərkəzinə çatdırıb. Sonuncunun həyatını xilas etmək mümkün olmayıb, Davit xəstəxanaya çatdırıldıqdan az sonra dünyasını dəyişib.

İstintaq zamanı hadisənin iştirakçılarının dairəsi üzə çıxıb. Hadisədə iştirak edən şəxslərin, o cümlədən cinayəti zahirən törətmiş şəxsin müəyyən edilərək prosesi həyata keçirən orqana təqdim edilməsi istiqamətində tədbirlər davam etdirilir.

Hüseyn İbadlı