Fariz Əhmədov vəzifədən getdi

“Azərbaycanfilm” kinostudiyasının rəhbəri Fariz Əhmədov vəzifəsindən gedib.

Publika.az xəbər verir ki, bu barədə F.Əhmədov özü sosial mediada status paylaşıb.

Onun müraciətini təqdim edirik:

“Əziz dostlar və həmkarlar, 1 mart 2022-ci il tarixindən etibarən “Azərbaycanfilm” kinostudiyasının direktoru vəzifəsindən ayrıldım. Bu vəzifədə çalışdığım 17 ay ərzində müxtəlif layihələr həyata keçirdik, qısametrajlı bədii, sənədli, tammetrajlı filmlər, bədii və sənədli seriallar ərsəyə gətirdik. Bir çox kino mütəxəssisləri ilə birlikdə çalışdıq. Yüzlərlə vətəndaşla ünsiyyətdə olduq. Bu müddətdə mənə etimad və dəstək göstərənlərə öz dərin təşəkkürümü bildirirəm. Audiovizual və interaktiv media şöbəsinin rəhbəri Rüfət Həsənova mənə inandığı, dözdüyü və dəstəklədiyi üçün xüsusi minnətdarlığımı bildirirəm.

“Azərbaycanfilm” kinostudiyası olaraq müxtəlif qurumlarla əməkdaşlıq etdik. Bu qurumlardan İctimai Televiziya və Radio Yayımları Şirkətini və Bakı Media Mərkəzini xüsusi qeyd etmək istəyirəm. Yeni audiovizual layihələrin ərsəyə gəlməsində bizə dəstək göstərdikləri, yanımızda olduqları üçün Balash Kasumov-a və Orman Aliyev -ə təşəkkür edirəm.

“Azərbaycanfilm” kinostudiyasının doğma kollektivinə və yeni rəhbərliyinə yeni-yeni uğurlar arzu edirəm.

Mən yenə də audiovizual layihələrin istehsalı sahəsində olan fəaliyyətimi davam etdirəcəm. Yeni işlərdə, yeni layihələrdə yenə də birlikdə olacayıq. Yenə də Azərbaycan kinosuna xidmət etməyə davam edəcəyik...”