Boranı plov – Resept

Tabloid.az boranılı plovun reseptini təqdim edir:

İnqrediyentlər:

1 toyuq

750 qram boranı

4 baş soğan

200 qram badam

ərinmiş yağ

duz

sarıkök

Badamın üstünə qaynar su töküb 5 dəqiqə saxlayın. Aşsüzənə yığıb qabığını təmizləyin.

Toyuğu doğrayın, soğanı yarım halqa doğrayın. Boranını orta ölçülü kublara doğrayın.

Bunların hamısını ayrılıqda ərinmiş yağda qovurun. Soğanı əvvəlcə ağzıbağlı tavada qovurun, sonra isə qapağını açaraq qızardın.

Toyuğu ağzıbağlı tavada bişirin. Duz vurun, qıpqırmızı qızaranda ocaqdan götürün.

Boranını ağzıbağlı tavada bişirin. Duz vurun, sonra ağzıaçıq tavada bir qədər qızardın. Soğan və badamı əlavə edin.

Toyuğu əlavə edin, bıçağın ucunda sarıkök vurun, 20 ml qaynanmış su tökün, tavanın qapağını bağlayıb zəif odda 30 dəqiqə bişirin. 30 dəqiqə ərzində bütün suyu quruyub, ancaq yağı qalacaq.

Plov

Tərkibi:

500 qram basmati düyüsü

750 qram boranı

3 xörək qaşığı duz

sarıkök

2 xörək qaşığı xama

20 q kərə yağı

80 q ərinmiş yağ

1 yumurta

3 l su qaynadın. 3 xörək qaşığı duz əlavə edin. Su qaynayanda düyünü tökün, arada qarışdırın, düyü yarım bişmiş hala gələndə kubik doğranmış boranını əlavə edin, qarışdırın, 3 dəqiqə bişirin. Süzün.

Boranı diri qalmalıdır. Azca sarıkök əlavə edin, ehtiyatla qarışdırın.

Qazmaq:

Dərin kasaya 1 yumurta qırın, 2 xörək qaşığı xama və 4 xörək qaşığı süzülmüş düyü əlavə edin (çalışın, içinə boranı qarışmasın, yoxsa yanar), qarışdırın.

İri qazanın dibinə 80 qram ərinmiş yağ qoyun.

Qaynara düşəndə ocağı azaldın, yumurtalı qarışığı - qazmağı tökün, hamarlayın, qazanın qapağını örtün, 3-5 dəqiqə bişirin.

Süzülmüş düyünü əlavə edin, əzmədən hamarlayın. Düyünün üstünə parça-parça kərə yağı qoyun.

Qazanın qapağına təmiz, nəm dəsmal çəkin, qazanın ağzını örtün. Ya da qapağa xüsusi "papaq" geydirin. Zəif odda plovu 45 dəqiqə dəmləyin.

Qazmaq asan çıxsın deyə qazanı ocaqdan götürəndə yaş dəsmalın üstünə qoyun.

Boşqaba düyü çəkin, qazmağı bölüb üstünə düzün.

Qarniri yanında, yaxud buluddakı plov təpəciyinin üstündə verin.