ABŞ tezliklə Ukraynaya "Patriot" verəcək

ABŞ prezident administrasiyası "Patriot" zenit-raket komplekslərini Ukraynaya təhvil verməyə hazırlaşır.

Publika.az xəbər verir ki, bu barədə CNN anonim yüksək vəzifəli məmurlara istinadla xəbər verir.

Bildirilib ki, bununla bağlı qərar bu həftə verilə bilər.

Pentaqonun planı imza üçün prezident Co Baydenə göndərilməzdən əvvəl hələ də müdafiə naziri Lloyd Austin tərəfindən təsdiqlənməlidir. Üç məmur CNN-ə təsdiqin gözlənildiyini bildirib.

CNN həmsöhbətləri Ukraynanın nə qədər qurğu əldə edə biləcəyini açıqlamayıblar.

Əgər Ukrayna həqiqətən də “Patriot” alsa, bu, müttəfiqlərin ukraynalılara təhvil verdiyi ən güclü və təkmil raket əleyhinə silah olacaq.

“Patriot” buraxılış qurğuları müxtəlif modifikasiyalı raketləri, o cümlədən 80 km-ə qədər məsafədə və 20 km yüksəklikdə hədəfləri vura bilən raketləri yükləyə bilir. Sistem səsdən yüksək sürətlə uçan hədəfləri məhv etmək üçün nəzərdə tutulub və eyni zamanda 125-ə qədər hədəfi izləyə və onlardan altısına raketləri yönəldə bilir.

Ukrayna uzun müddətdir və israrla Qərb müttəfiqlərindən ona "Patriot" kimi Rusiya raketlərinə qarşı güclü müdafiə vasitəsi vermələrini xahiş edib.

Hüseyn İbadlı