Behrudi səhhətindən danışdı: “Düzgün diaqnoz qoya bilmirlər”

“Hazırda səhhətim yaxşı deyil. Başımda və onurğa sütunumda şiddətli ağrılarım olur. Həkimlər nə deyirsə, edirəm, amma hələ ki, bir nəticə yoxdur. Doğrudur, burada həkim dostlarım çoxdur, əllərindən gələni edirlər, amma hələ ki, bir şey alınmır”.

Bunu Publika.az-a açıqlamasında türk dünyasının tanınmış fikir adamı, şair Rüstəm Behrudi səhhəti ilə bağlı danışarkən deyib. Şairin sözlərinə görə, hələ ki, çoxşaxəli xəstəlikləri ilə mübarizə apara bilir:

“Həkimlər nə deyirlərsə, edirəm, fəqət, bir nəticə hasil olmur. Bir də görürsən ki, təzyiqim 150-yə, şəkərim isə 250-270-ə qalxır. Hələ ki, ağrılarıma qarşı dayanıram, etiraz edirəm, mübarizə aparıram. Amma gərək mübarizədən artıq da şeylər edəsən”.

Rüstəm Behrudi indiyə qədər aldığı müalicənin qeyri-effektiv olmasını düzgün diaqnoz qoyulmaması ilə əlaqələndirib:

“Düzgün diaqnoz qoya bilmirlər. Hələ ki, yollar açılmayıb, yollar açılan kimi xaricə üz tutacağam. Müalicə üçün Türkiyədə çox olmuşam, yəqin ki, imkan olsa, bu dəfə səhiyyənin daha yaxşı inkişaf etdiyi ölkələrə - İsrailə, Almaniyaya, Avropa ölkələrinə, bir sözlə, daha uzağa getmək istəyirəm. Çünki bu ağrılar mənim axırıma çıxıb. Yolların açılmasını gözləyirəm. Səhhətim əl vermədiyi üçün idman da edə bilmirəm”.

Tural Turan