Azadlığa çıxan Sarkozidən İLK AÇIQLAMA: "Gözləmirdim..."

Fransanın keçmiş prezidenti Nikolya Sarkozi azdlığa çıxandan sonra deyib ki, o, real həbs cəzasına məhkum ediləcəyini gözləmirdi.

Publika.az xəbər verir ki, bu barədə "Le Journal du Dimanche" məlumat yayıb.

"Mən hər şeyə hazır idim, amma bunun üçün yox, etiraf edirəm. İşlər təsəvvür etdiyimdən də irəli gedib; qanunun aliliyinin bütün hədləri pozulub", - o deyib.

Sarkozi əlavə edib ki, apellyasiya şikayətinə qədər dayandırılmadan cəzanın verilməsinin səbəbini anlamayıb.

Paris məhkəməsi daha əvvəl Sarkozini 2007-ci ildəki seçki kampaniyasını Liviyanın maliyyələşdirməsi ilə bağlı 5 il həbs cəzasına məhkum etmişdi.

Müstəntiqlərin sözlərinə görə, Sarkozi 2005-ci ildə Liviyanın o vaxtkı lideri Müəmmər Qəddafi ilə beynəlxalq səhnədə siyasi dəstək müqabilində seçki kampaniyası üçün vəsait almaq barədə razılığa gəlib.

Keçmiş prezident korrupsiyada, seçki kampaniyasını qanunsuz maliyyələşdirməkdə və Liviya dövlətinin vəsaitlərini gizlətməkdə ittiham olunurdu. Sarkozi özü dəfələrlə bəyan edib ki, ittihamlar heç bir tutarlı sübuta əsaslanmır.

Hüseyn İbadlı