Avropa

Siyasətimizdən və ölkəmizdən rədd ol! - Nazirdən İlon Maska sərt mesaj

1 Oktyabr 2025 20:20

Britaniyanın energetika və sıfır emissiya məsələləri üzrə dövlət katibi Ed Milibend amerikalı milyarder İlon Maska sərt mesaj ünvanlayıb.

Publika.az xəbər verir ki, o, Liverpulda keçirilən Leyboristlər Partiyasının konfransında İlon Maskla bağlı sərt sözlər səsləndirib.

Energetika nazirinin sözlərinə görə, İlon Mask və Reform UK Partiyasının lideri Naycel Faraj “cəmiyyətləri və həyat tərzimizi birləşdirən bağları məhv etmək istəyən qlobal şəbəkənin bir hissəsidir”.

“İlon Mask küçələrdə zorakılığa çağırış edir. O, seçilmiş hökumətin devrilməsini istəyir. X platforması vasitəsilə dezinformasiya yayır və düşünür ki, bizə Britaniyanı necə idarə etməyi diktə edə bilər. Konfransda bizim İlon Maska mesajımız budur: siyasətimizdən və ölkəmizdən rədd ol!”, - deyə Milibend vurğulayıb.

Qeyd edək ki, bundan əvvəl İlon Mask Londonda ifrat sağçı Tommi Robinsonun təşkil etdiyi mitinqdəki nümayişçilərə “mübarizə aparın, ya da ölün” çağırışı etmişdi.