Fransa siyasi böhrandan çıxa biləcək? - Makronun onların dəstəyinə ehtiyacı var

Fransada davam edən siyasi böhran fonunda yeni tətillər keçirilir. Həmkarlar ittifaqları hələ hökuməti formalaşdıra bilməyən yeni baş nazirə büdcə və fövqəlvarlıların vergisi ilə bağlı təzyiqləri artırmaq niyyətindədirlər.

Publika.az xəbər verir ki, bu barədə "The Guardian" məlumat yayıb.

Fransanın həmkarlar ittifaqları yeni baş nazir Sebastian Lekornuya büdcənin azaldılması məsələsini yenidən nəzərdən keçirməsi və super varlılara sərvət vergisi tətbiq etməyi düşünməsi üçün təzyiq göstərmək məqsədilə tətillər keçirir.

Qeyd olunur ki, Lekornu sentyabrın 9-da sələfi Fransua Bayrunun təklif edilən büdcə kəsirlərinə görə vəzifəsindən kənarlaşdırıldığı siyasi böhran şəraitində təyin olunduqdan sonra hələ yeni hökuməti formalaşdırmayıb. Lekornunun yeni kabinetini elan etməkdə görünməmiş gecikməsi büdcənin azaldılması və ictimai xidmətlərin qorunması ilə bağlı narahatlıqlarını ifadə edən müxalifət partiyalarını və həmkarlar ittifaqlarını qəzəbləndirib.

Polisin məlumatına görə, sentyabrın 18-də keçirilən ümummilli tətildə 1 milyona qədər nümayişçi iştirak edib. Bu səbədən də Fransada 70 minə yaxın polis və jandarm səfərbər edilib.

Qeyd olunur ki, Lekornunun gələn həftə parlamentdə ilk çıxışını edəcəyi və yaxın günlərdə yeni hökumətinin tərkibini açıqlayacağı gözlənilir.

O da bildirilir ki, Makronun mərkəzçi fraksiyasının parlamentdə çoxluğu yoxdur və büdcəni qəbul etmək üçün sağçı Respublikaçılar Partiyası və Sosialistlərin dəstəyinə ehtiyacı var.

Lekornu sosialistlərin dəstəklədiyi iqtisadçı Qabriel Zukmanın 2026-cı il büdcəsində Fransa vətəndaşlarının ən zəngin 0,01%-i üçün 2% sərvət vergisi tətbiq etmək təklifini rədd edib. Büdcənin qəbuluna kömək etmək üçün sərvət vergisini artırmaq istəyən sosialistlər cümə günü Lekornu ilə görüşəcəklər.

Adəm