“Qərar verilib, müharibə yaxınlaşır” - Orbandan CİDDİ XƏBƏRDARLIQ

"Aİ liderləri 2030-cu ilə qədər Rusiya ilə müharibəyə hazırlaşmaq barədə qərar qəbul ediblər, lakin Macarıstan hökuməti bu cür hadisələrin qarşısını almaq üçün hər şeyi edəcək".

Publika.az xəbər verir ki, bunu Macarıstanın Baş naziri Viktor Orban şənbə günü Keçkemetdə keçirilən mitinqdə çıxışı zamanı deyib.

Onun sözlərinə görə, Ukrayna münaqişəsinin davam etdirilməsi və Rusiya ilə birbaşa qarşıdurmanın davam etdirilməsi üçün Aİ-nin hazırkı rəhbərliyinin yürütdüyü siyasət kursu tərəfindən göndərilən “təhdid siqnalları” ciddi qəbul edilməlidir.

"Müharibə yaxınlaşır və təhlükə siyasidir. Avropa liderləri artıq qərar veriblər ki, Avropa münaqişəyə hazırlaşmalıdır. Rəsmi mövqe ondan ibarətdir ki, biz 2030-cu ilə qədər buna hazır olmalıyıq", - Orban deyib.

“Macarıstan hazırda təhlükə altındadır,” – hökumət başçısı çıxışı zamanı bildirib və əsas vəzifənin “Avropanı müharibədən qorumaq” olduğunu vurğulayıb. O, bu istiqamətdə səylərin artırılmasına çağırıb, lakin yalnız Macarıstanın cəhdlərinin kifayət etməyəcəyini də qeyd edib.

Buna baxmayaraq, Orban nümayiş iştirakçılarına əmin edib ki, hökuməti Ukraynadakı münaqişənin bitməsi üçün mümkün olan hər şeyi edəcək, ABŞ-ın hazırladığı sülh planını dəstəkləyəcək və Avropa İttifaqı rəhbərlərinin Avropanı Rusiya ilə hərbi qarşıdurmaya sürükləmək cəhdlərinə qarşı mübarizəni davam etdirəcək.

Macarıstanın Baş naziri həmçinin xalqa müraciət edərək, 2026-cı ilin aprelində keçiriləcək parlament seçkilərində hakim Fidesz partiyasına səs verməyə çağırıb ki, ölkə “Brüsselin təhlükəli planlarından uzaq qala bilsin”.

Hüseyn İbadlı