Bu Avropa ölkəsi də məcburi hərbi xidməti bərpa edir

Belçikanın müdafiə naziri Teo Franken Varşava Təhlükəsizlik Forumundakı çıxışında bildirib ki, Belçika gələcəkdə məcburi hərbi xidməti bərpa edə bilər.

Publika.az xəbər verir ki, Belçika Müdafiə Nazirliyinin rəhbəri bildirib ki, "Belçikada hərbi xidmətə çağırış yoxdur. Əvvəllər mövcud idi, amma 1990-cı illərdə dayandırılıb. Gələcəkdə yenidən tətbiq oluna bilər. Görərik".

Franken ölkədə hələlik hərbi xidmətə çağırışla bağlı siyasi fikir birliyinin olmadığını etiraf edib. Bununla belə, o, məsələnin parlamentdə fəal şəkildə müzakirə olunduğunu söyləyib.

Bu, Frankenin bütün gənc kişilərin məcburi hərbi xidmətə çağırılması ilə bağlı ikinci açıqlamasıdır. Bir həftə əvvəl o, sosial mediada yazırdı ki, hərbi xidmətə çağırışın bərpası Valloniya və Brüsseldəki iğtişaşlarla nəticələnən hazırkı məktəb etirazlarına bənzər bir ssenarinin qarşısını almağa kömək edəcək.

“İnanıram ki, məcburi hərbi xidməti bərpa etməliyik. Hər kəs ümumi rifah naminə çalışmağı öyrənməlidir", - nazir deyib.

O, xidmətin mütləq hərbi olmalı olmadığını və səhiyyə və ya təhsil sahələrində baş verə biləcəyini vurğulayıb.

Nazirin sözlərinə görə, bu, dayanıqlılığı və sosial birliyi gücləndirməyə yönəlmiş "əsl icma layihəsidir".

Müəllif: Tural