Əliqismət Lalayev: “Musiqili Teatr I Avropa Oyunlarına hazırdır”
Bizi izləyin

Bakı 2015

Əliqismət Lalayev: “Musiqili Teatr I Avropa Oyunlarına hazırdır”

Azərbaycan Dövlət Musiqili Teatrı iyun ayında Azərbaycanda keçiriləcək I Avropa Oyunları ilə bağlı xüsusi tədbirlər planı hazırlayıb.

Publika.az-a danışan Teatrın direktoru Əliqismət Lalayev Musiqili Teatrın “Bakı-2015” Avropa Oyunları ilə əlaqədar iyun ayında xüsusi repertuar əsasında fəaliyyət göstərəcəyini söyləyib:

“İyunda teatrımızda 15 tamaşanın 24 dəfə nümayiş olunması nəzərdə tutulur. Bu səhnə əsərlərinin siyahısına klassik, müasir və uşaq tamaşaları daxildir. Bildiyiniz kimi gələn ay ölkəmizə dünyanın müxtəlif ölkələrindən qonaqların- turistlərin, azarkeşlərin gəlməsi gözlənilir. Bunu nəzərə alaraq repertuarımızda olan bir sıra əsərləri ingilis dilinə tərcümə etmişik. Üzeyir Hacıbəylinin “O olmasın, bu olsun”, “Ər və arvad”, O. Kazimi və R. Heydərin “Qızıl toy”, J.B. Molyerin “Skapenin kələkləri”, Ə. Haqverdiyevin “Kimdir müqəssir?”, R. Hacıyev, E. Ocaqov, F. Zöhrabovun “Talelər qovuşanda” və başqa əsərlər ingilis dilində tərcümə – qaçan titrlər vasitəsilə əcnəbi qonaqlarımız üçün nümayiş olunacaq. Azərbaycan Respublikası Mədəniyyət və Turizm Nazirliyinin xüsusi sifarişi ilə yaradılan bu imkanlar bundan sonra tamaşalarımızın xarici dillərdə nümayişinə də imkan yaradacaq. Biz yaxın günlərdə artıq bu təcrübədən istifadə etmişik və əldə olunan nəticə gözlədiyimizdən də yüksək səviyyədə olub. Bu günlərdə Bakıda keçirilən Asiya İnkişaf Bankının Rəhbərlər Şurasının 48-ci İllik toplantısının iştirakçıları - təqribən 70-ə yaxın dövləti təmsil edən 400-ə yaxın mötəbər qonaq bu üsulla teatrımızda dahi Üzeyir Hacıbəylinin “O olmasın, bu olsun” tamaşasını izlədi. Tamaşadan sonra qonaqlar çox böyük zövq aldıqlarını və razı qaldıqlarını bildirdilər”.

Direktor bir sıra tamaşaların da rus dilində nümayiş olunacağını deyib.

“Bütün bunları nəzərə alaraq tam məsuliyyətlə qeyd edə bilərəm ki, Azərbaycan Dövlət Musiqili Teatrı I Avropa Oyunlarına hazırdır” - deyə Əliqismət Lalayev bildirib.

Cəvahir

Oxumağa davam et
Reklam
Reklam

Gündəm