İnsanları çarmıxa çəkən ŞƏRİƏT qanunları - - FOTO

Malayziyanın Kelantan ştatında şəriət qanunları əsasında tərtib edilən qanunvericilik ağlasığmaz işgəncələrlə yenidən gündəmə gəlib.

Publika.az xəbər verir ki, sözügedən qanunvericilik üzvlərinin əksəriyyəti İslam Partiyasının deputatlarından təşkil olunmuş parlament tərəfindən təsdiqlənib.

Sənədə əsasən həbsxana daxilində tətbiq edilən ağırlaşdırılmış cəzalandırma prosesi ictimai yerlərdə də gerçəkləşdirilə bilər: "Bu dini normalara uyğundur", deyə ştatın nazir müavini Moxt Amar Nik Abdulla bildirib.

Hələ rəsmi olaraq qüvvəyə minməyən qanun layihəsi haqqında ştatın Mədəniyyət və Turizm naziri Nəzir Əbdül Əziz danışıb. Onun sözlərinə görə bunun turist axınına heç bir dəxli yoxdur: "Yeni qanun ailə münaqişələri zamanı ər-arvad xəyanətinə və alkoqollu içki qəbul edən şəxslərə tətbiq ediləcək. Onlar insanların gözü qarşısında şallaqlanacaqlar. İnanmıram ki, bu turistləri narahat etsin çünki, onlar bu ərazilərə çox az diqqət göstərir. Əgər şəriət qanunları onları narahat edirsə bura heç gəlməsinlər".

Hal-hazırda 92,5 faizi İslam dininə inanan Kelantana əhalisi qismən də olsa şəriət qanunlarına söykənən qanunvericilik altında yaşayırlar. Burada gecə klubları və kinoteatrların yaradılması qəti şəkildə qadağandır.

Könül Cəfərli