Şahzadə oteli tərk etdi və... - İDDİA

G20 (“Böyük iyirmilik”) liderlər sammiti üçün Argentinada olan Səudiyyə Ərəbistanının vəliəhd şahzadəsi Məhəmməd bin Salman argentinalı prokurorların Camal Qaşıqçı cinayəti ilə əlaqədar araşdırmaya başlaması səbəbiylə qaldığı lüks oteldən öz ölkəsinin səfirliyinə köçüb.

Publika.az xəbər verir ki, bu iddia ilə “Human Rights Watch” hüquq-müdafiə təşkilatı çıxış edib.

Daha əvvəl isə “Human Rights Watch” Qaşıqçının qətli ilə Argentinanı Məhəmməd bin Salman barəsində tədbir görməyə çağırmışdı. Təşkilat onu həbs etmək xahişi ilə dövlət prokuroru Ramiro Qonzalezə məktub göndərib. Təşkilat həmçinin, Yəməndəki vətəndaş müharibəsində Səudiyyə Ərəbistanı liderlik etdiyi koalisiya qüvvələrinin insan hüquqlarının pozmasına aid dəlilləri təqdim etmişdi.

Argentina hökuməti isə Səudiyyə şahzadəsinin ölkəsinin nümayəndəsi kimi hüquqi toxunulmazlığına sahib olacağını söyləmişdi.

Qeyd edək ki, səudiyyəli jurnalist oktyabrın 2-də Səudiyyə Ərəbistanının İstanbuldakı Baş konsulluğunda öldürülüb.

Ömər Dağlı