Dünya

İran nüvə sazişinin bərpası üçün şərtləri açıqladı

10 Aprel 2022 17:24

İran parlamenti beynəlxalq vasitəçilərlə nüvə sazişinin bərpası üçün zəruri şərtləri açıqlayıb.

Publika.az "Tasnim"ə istinadən xəbər verir ki, bu barədə İslam Məşvərət Şurasının deputatlarının Prezident İbrahim Rəisiyə göndərdiyi məktubda qeyd edilib.

Əsas şərtlər arasında ABŞ-ın Tehrana qarşı yeni sanksiyalar tətbiq etməkdən imtina etməsi, ABŞ-ın sazişlərdən çıxmayacağına dair Konqresin təsdiqlədiyi təminatlar, həmçinin İran neftinin ixracına qoyulan məhdudiyyətlərin aradan qaldırılması daxildir.

Hazırkı siyahıya İranın Xarici İşlər naziri Hüseyn Əmir Abdullahianın daha əvvəl səsləndirdiyi şərt - ABŞ-ın terror təşkilatı hesab etdiyi İran kəşfiyyatı olan İslam İnqilabı Keşikçiləri Korpusuna qarşı sanksiyaların götürülməsi şərti daxil deyil.

Aprelin 9-da Rəisi bəyan edib ki, İran sülh xarakterli hesab etdiyi nüvə proqramından imtina etməyəcək.