Dünya

Məhkəmə Dodonla bağlı QƏRAR VERDİ

26 May 2022 21:00

Moldovanın keçmiş prezidenti rusiyayönümlü İqor Dodon 30 sutka ev dustaqlığına buraxılıb.

Publika.az xəbər verir ki, bu barədə "NewsMaker" məlumat yayıb.

Qeyd olunur ki, bu barədə qərar cümə axşamı Çekan məhkəməsi tərəfindən qəbul edilib.

Mayın 24-də səhər saatlarında hüquq-mühafizə orqanlarının əməkdaşları Dodonun evinə gəliblər. Prokurorluqdan bildirilib ki, axtarışda Korrupsiyaya Qarşı Mübarizə Milli Mərkəzinin və İnformasiya və Təhlükəsizlik Xidmətinin əməkdaşları iştirak edib. Onlar qeyd ediblər ki, cinayət işi korrupsiya, qanunsuz varlanma, vətənə xəyanət və siyasi partiyanın cinayətkar təşkilat tərəfindən maliyyələşdirilməsi ilə bağlıdır.

Dodonun axtarışı təxminən 12 saat davam edib. O, saxlanılaraq karserə salınıb. Onun qohumu Petro Merinyan da saxlanılıb. Mayın 25-də prokurorlar Dodona qarşı 30 günlük həbs-qətimkan tədbiri tələbi ilə ittiham irəli sürüblər.

Qeyd edək ki, ötən ilin dekabrında Dodon 12 milyon dollara yaxın pul mənimsəməkdə şübhəli bilinirdi. İstintaqın məlumatına görə, o, iqtisadiyyat və ticarət naziri kimi rəy verib, onun əsasında 2008-ci ilin mayında elektrik enerjisinin alınmasına dair müqavilə imzalanıb, halbuki "Enerqokom" artıq danışıqlar aparıb və aşağı qiymətə elektrik enerjisinin alınması üçün iki müqavilə imzalayıb.

Xatırladaq ki, İ.Dodon 2016-cı il dekabrın 23-dən 2020-ci il dekabrın 24-dək Moldova Respublikasının prezidenti olub.