Hazırda yayılan qrip deyil, başqa virusdur - İnfeksionist

“Son bir ay ərzində qripəbənzər virusa yoluxma halları kəskin artıb. Çünki payızın gəlməsi ilə respirator xəstəliklərə yoluxma da artır”.

Bu fikirləri Publika.az-a açıqlamasında həkim infeksionist Mərdan Əliyev deyib.

Onun sözlərinə görə, havaların qəfildən soyuması, günəşin aktivliyinin azalması, immun sisteminin zəifləməsi insan orqanizmində adaptasiya prosesini pozur. Bu isə xəstəliyə həssaslığı artırır:

“Virusa yoluxan şəxs yenidən xəstələndikdə onu daha ağır keçirir. Hazırda geniş yayılan xəstəlik qrip deyil, kəskin respirator virus infeksiyalarından biridir. Həmin xəstəliyi törədən iki yüzə yaxın virus var. Bu virusa yoluxmuş xəstələrdə koronavirusdan və qripdən fərqli olaraq qızdırma və halsızlıq olmur. Əsas əlamətləri zökəm, boğaz ağrısı və öskürəkdir”.

Həkim insanların virusdan qorunması üçün tövsiyələrini qeyd edib:

“Bu xəstəlikdən özümüzü qorumaq üçün əsas geyimimizə, yuxu rejimimizə və qidalanmağımıza fikir verməliyik. Çünki qidalanma və yuxu rejimi birbaşa immunitetlə əlaqəlidir. Evin havasını gün ərzində iki dəfə, səhər və axşam dəyişmək lazımdır. Bunlara riayət eləsək, virusa yoluxsaq belə, xəstəliyi yüngül keçirərik”.

Aydan Baydullayeva