İranın gülünc cavabı: Aİ ölkələrinin ordularını terror təşkilatı kimi tanıyacaq

Avropa Parlamenti SEPAH-ı terror təşkilatları siyahısına daxil etməyə çağıran qətnaməni təsdiqləyib.

Publika.az xəbər verir ki, buna cavab olaraq, İran parlamenti Aİ ölkələrinin ordularını terror təşkilatı kimi tanıyaraq mövcud qanunvericiliyə düzəlişlər etmək niyyətindədir. Bu barədə İran parlamenti məlumat yayıb.

“Parlamentdə “ABŞ-ın SEPAH-ı terror təşkilatı kimi təyin etməsinə reaksiya haqqında” qanuna dəyişiklik etmək üçün düzəliş layihəsi hazırlanıb. Bu layihə Aİ-yə üzv dövlətlərə, eləcə də onların silahlı qüvvələrinə şamil ediləcək”.

Bir gün əvvəl Avropa Parlamenti Aİ rəhbərliyini SEPAH-ı iddia edilən terror fəaliyyətləri, nümayişçilərə qarşı repressiyalar və Rusiyaya PUA-ların tədarükünə görə terror təşkilatları siyahısına daxil etməyə çağıran qətnaməni təsdiqləyib. Buna cavab olaraq İranın xarici işlər naziri Hüseyn Əmir Abdullahiyan Avropa diplomatiyasının rəhbəri Josep Borrell ilə telefon danışığı zamanı Avropa Parlamentinin bu niyyətini “Avropanın ayağına güllə atmaq” adlandırıb. O, Avropanı impulsiv niyyətinin mənfi nəticələri barədə düşünməyə və İranla konstruktiv əlaqəyə keçməyə çağırıb.

Ayşən