Vahid Ələkbərov xaricdəki biznesini satdı: Azərbaycandakı "Lukoyl" məntəqələrini bu şirkət aldı

Yanvarın 29-da Rusiyanın "Lukoyl" neft şirkəti Amerikanın "Carlyle" investisiya şirkəti ilə müqavilə imzaladığını elan edib.

Publika.az xəbər verir ki, investisiya şirkəti Avropada neft emalı zavodlarına, yanacaqdoldurma məntəqələri şəbəkəsinə və bir neçə neft yatağına sahib olan "Lukoyl International GmbH" şirkətinin xarici aktivlərini əldə edib.

Satışa ABŞ-ın sanksiyalarının qarşısının alınması səbəb olub

ABŞ Maliyyə Nazirliyi 23 oktyabr 2025-ci ildə “Lukoyl” da daxil olmaqla Rusiyanın iki böyük neft şirkətinə qarşı yeni məhdudiyyətlər tətbiq edib.

Sanksiyalar onların nəzarəti altında olan bütün qurumlara, eləcə də “Lukoyl” şirkətinə 50 faiz və ya daha çox birbaşa və ya dolayı yolla məxsus olan bütün şirkətlərə təsir göstərib. Sanksiyaların bloklanması “Lukoyl”ın bu şirkətlərin idarə olunmasında və onlarla hər hansı əməliyyatda iştirakını iflic edir.

Mövcud məlumata görə, sövdələşmə “Lukoyl”in bütün xarici aktivlər portfelini əhatə edə bilər. Şirkət Avropada neft emalı zavodlarına, Avropa, Asiya və Yaxın Şərqdə 2000 yanacaqdoldurma məntəqəsinə, eləcə də bir neçə neft yatağına sahibdir. Şirkət Azərbaycan, Qazaxıstan, Özbəkistan, İraq, Misir, Kamerun, Nigeriya, Qana, Meksika, Birləşmiş Ərəb Əmirlikləri və Konqo Respublikasındakı layihələrdə iştirak edir.

Müxtəlif hesablamalara görə, portfelin ümumi dəyəri 14 milyard dollardan 22 milyard dollara qədər dəyişə bilər.

1987-ci ildə Vaşinqtonda təsis edilən “Carlyle” şirkəti özəl kapital, real aktivlər və özəl kredit sahəsində ixtisaslaşıb. PEI 300 indeksinə görə, 2010-cu ildən 2015-ci ilə qədər cəlb edilmiş kapitala görə özəl kapital şirkətləri arasında birinci yerdə qərarlaşan dünyanın ən böyük investisiya firmalarından biridir.

Tural